एजेन्सी – ब्राजिली फरवार्ड गाब्रियल जेसस र इंग्लिस फरवार्ड रहिम स्टर्लिङको गोल मद्दतमा म्यानचेस्टर सिटीले इंग्लिस प्रिमियर लिगमा बर्नलेमाथि उसकै मैदानमा २–० को सहज जित निकालेको छ ।

ट्रप मुरमा बुधबार राति भएको खेलमा दुवै गोल पहिलो हाफमा सम्भव भएको थियो । खेलको तेस्रो मिनेटमा नै जेससले गोल गर्दै सिटीलाई १–० ले अघि बढाएका थिए । रहिम स्टर्लिङको पासमा बर्नाडो सिल्भाको प्रहारलाई बर्नलेका गोलरक्षक निक पोपेले बचाएपनि रिवाउन्डमा जेससले क्लोज रेन्जबाट हेडमार्फत गोल गरेका थिए ।

३८औं मिनेटमा इल्केए गुन्डोगानको पासमा रहिम स्टर्लिङले गोल गर्दै सिटीको अग्रता दोब्बर पारे । ४९औं मिनेटमा मिको गलत पासलाई गुन्डोगानले नियन्त्रणमा लिदै गरेको प्रहार पोस्ट नजिकैबाट बाहिरियो । ५१औं मिनेटमा पोपेले स्टर्लिङको प्रहारलाई उत्कृष्ट बचाउ गरे ।

६३औं मिनेटमा बर्नलेले सुवर्ण अवसर पाएपनि सदुपयोग गर्न नसक्दा गोल अन्तर कम गर्नबाट चुक्यो । त्यसपछि थप गोल निस्कन नसक्दा सिटी २–० ले विजयी हुन सफल भयो ।

यो जितसँगै सिटीले शीर्षस्थानमा स्पष्ट ३ अंकको अग्रता लिएको छ । एक खेल कम खेलेको सिटीको २१ खेलबाट ४७ अंक छ । दोस्रोमा रहेको म्यानचेस्टर युनाइटेडको ४४ अंक छ । पराजित बर्नले २२ अंक जोडेर १७औं स्थानमा छ ।