एजेन्सी – इंग्लिस प्रिमियर लिगमा चेल्सीले टोटेनहम हस्टपरलाई उसकै मैदानमा १–० ले पराजित गरेको छ ।

टोटेनहम हस्टपर स्टेडियममा बिहीबार राति भएको खेलमा चेल्सीको जितमा पहिलो हाफमा जर्गिन्होले पेनाल्टीमार्फत गरेको गोल नै निर्णायक बन्यो । जर्गिन्होले २४औं मिनेटमा पेनाल्टीमार्फत गोल गर्दै चेल्सीलाई १–० को अग्रता दिलाए ।

कप्तान सिसर एज्पिलिक्वेटाको पासमा टिमो वेर्नरले पेनाल्टी बक्सतर्फ बल अघि बढाउदै गर्दा इरिक डाएरले वेर्नरमाथि फल गरेपछि रेफ्रीले चेल्सीलाई पेनाल्टी प्रदान गरेको थियो । जसमा जर्गिन्हो चुकेनन् ।

३४औं मिनेटमा बल बचाउने क्रममा सिल्भा कार्लाेस भिनिसियससँग जुध्न पुग्दा सेन्टर ब्याक थियागो सिल्भाले चोट बोकेपछि चेल्सीले एन्ड्रिएस क्रिस्टेन्सनलाई मैदान प्रवेश गराएको थियो । ४२औं मिनेटमा ह्युङ मिन सनको फ्रिकिकमा सर्जी औरिएरको प्रहारलाई गोलरक्षक इडुआर्ड मेन्डीले सहजै बचाउदा टोटेनहम बराबरीबाट चुक्यो ।

५४औं मिनेटमा मासन माउन्टको पासमा कलुमहड्सन ओडोईको प्रहार ह्युगो लोरिसले मुस्किलले बचाए । ६०औं मिनेटमा मासन माउन्टले सुवर्ण मौकालाई सदुपयोग गर्न सकेनन् । ७६औं मिनेटमा मासन माउन्टको पासमा टिमो वेर्नरले अर्काे सुवर्ण अवसर खेल फाल्दा चेल्सी अग्रता दोब्बर पार्नबाट चुक्यो ।

७९औं मिनेटमा इरिक लमेलाले एङ्गोलो कान्टेलाई बिट गर्दै गरेको प्रहारलाई गोलरक्षक मेन्डीले डाइभ दिदै बचाए ।

यो जितसँगै चेल्सी २२ खेलबाट ३६ अंक जोडेर छैटौं स्थानमा उक्लिएको छ । पराजित टोटेनहम २१ खेलबाट ३३ अंक जोडेर आठौं स्थानमा रहेको छ ।