काठमाडौं (हाम्रो खेलकुद) – चन्द्रपुर नगरपालिका रौतहटले राष्ट्रिय महिला लिगमा बिराटनगर महानगरपालिका मोरङलाई १–० ले पराजित गरेको छ ।

सातदोबाटोस्थित एन्फा कम्प्लेक्सको खेल मैदानमा आइतबार भएको खेलको ७०औं मिनेटमा रजनी थोकरले गरेको गोल नै चन्द्रपुरको जितमा निर्णायक बन्यो । यससँगै चन्द्रपुरले पहिलो राउन्डमा भोगेको हारको बदला लिएको छ । पहिलो राउन्डमा चन्द्रपुर ५–० ले पराजित भएको थियो ।

३२औं मिनेटमा मेनुका आलेको पेनाल्टी बक्सबाहिरको प्रहार पोस्टमाथिबाट थोरै बाहिरिला चन्द्रपुर अग्रता लिनबाट चुक्यो । ३६औं मिनेटमा मेनुका आलेको प्रहारलाई बिराटनगरकी गोलरक्षक तथा कप्तान कल्पना कार्कीले सहजै नियन्त्रणमा लिइन् ।

३९औं मिनेटमा बिराटनगरकी पार्वती घलेको प्रहार आकासियो । ५८औं मिनेटमा सविता रानामगरको प्रहारलाई गोलरक्षक कल्पना कार्कीले सुरुवातमा फुस्काएपनि दोस्रो प्रयासमा गोललाइनबाट बचाउदा चन्द्रपुर अग्रता लिनबाट चुक्यो ।

७०औं मिनेटमा रजनी थोकरले गोल गर्दै चन्द्रपुरलाई १–० को अग्रता दिलाइन् । सुष्मा महर्जनले दिएको लामो पासमा सविता राना मगरले हेडमार्फत मुभ सिर्जना गरेकी थिइन् । रजनीले सुनिता भोलानको अन्तिम पासमा सहजै फिनिस गरिन् । त्यसपछि थप गोल निस्कन नसक्दा चन्द्रपुर विजयी हुन सफल भयो ।

यो जितसँगै छैटौ स्थानमा रहेको चन्द्रपुरको ७ खेलबाट ६ अंक पुगेको छ । पराजित बिराटनगर ७ खेलबाट १० अंक जोडेर तेस्रो स्थानमा रहेको छ ।