एजेन्सी – इंग्लिस प्रिमियर लिगमा लिभरपुलले शीर्षस्थानमा रहेको म्यानचेस्टर सिटीसँग घरेलु मैदानमै लज्जास्पद हार बेहोरेको छ ।

एनफिल्डमा आइतबार राति भएको खेलमा लिभरपुल सिटीसँग ४–१ ले पराजित भएको हो । सिटीको जितमा इल्केए गुन्डोगानले २ तथा रहिम स्टर्लिङ र फिल फोडेनले समान एक गोल गरे । मोहम्मद सलाहको गोल सान्त्वना बन्यो ।

सवै पाँच गोल दोस्रो हाफमा निस्कदा घरेलु टोली निरिह बन्न पुग्यो । ३७औं मिनेटमा इल्केए गुन्डोगान पेनाल्टीमा चुक्दा सिटीले पहिलो हाफमा अग्रता लिन सकेन । ४९औं मिनेटमा गुन्डोगानले गोल गर्दै सिटीलाई १–० को हग्रता दिलाए ।

६३औं मिनेटमा मोहम्मद सलाहले पेनाल्टीमार्फत गोल गर्दै खेललाई १–१ गोलको बराबरीमा ल्याए । ७३औं मिनेटमा गुन्डोगानले व्यक्तिगत दोस्रो गोल गर्दै सिटीलाई २–१ ले अघि बढाए । उनले फिल फोडेनको पासमा गोल गरेका थिए ।

७६औं मिनेटमा रहिम स्टर्लिङले बर्नाडो सिल्भाको पासमा गोल गर्दै सिटीलाई जिततर्फ अघि बढाए । ८३औं मिनेटम गाब्रियल जेससको पासमा फिल फोडेनले गोल गर्दै लिभरपुललाई ४–१ को लज्जास्पद हार चखाए ।

यो जितसँगै शीर्षस्थानमा रहेको सिटीको २२ खेलबाट ५० अंक पुगेको छ । उसले दोस्रो स्थानमा रहेको म्यानचेस्टर युनाइटेडलाई ५ अंकले पछि पारेको छ । पराजित लिभरपुल २३ खेलबाट ४० अंक जोडेर चौथो स्थानमा रहेको छ ।