एजेन्सी – केलियन एमबाप्पे र मोउरो इकार्डीको गोल मद्दतमा पेरिस सेन्ट जर्मेन (पीएसजी) ले फ्रेन्च लिग वानमा मार्सेमाथि २–० को सहज जित हात पारेको छ ।

मार्सेमा पीएसजीको जितमा दुवै गोल पहिलो हाफमा सम्भव भएको थियो । यस जितसँगै पीएसजीले गत सेप्टेम्वरमा घरेलु मैदानमा भोगेको १–० को हारको बदला लिएको छ ।

विवादित बनेको उक्त खेलमा पीएसजीका ३ तथा मार्सेका २ खेलाडीले रातो कार्ड पाएका थिए । पीएसजीका लेभिन कुर्जावा, लियान्द्रो डेनियल पारेडेस र नेयमारले रातो कार्ड पाउदा मार्सेका जोर्डन अमाभी र डारियो बेनेडेटियोले रातो कार्ड पाएका थिए ।

मार्सेमा आइतबार राति भएको खेलको नवौं मिनेटमा नै एमबाप्पेले गोल गर्दै पीएसजीलाई १–० का अग्रता दिलाए । उनले एन्जल डि मारियाको पासमा गोल गरेका थिए । २४औं मिनेटमा मोउरो इकार्डीले गोल गर्दै पीएसजीको अग्रता दोब्बर पारे । उनले एलसान्द्रो फ्लोरेन्जीको पासलाई गोलमा परिणत गरेका थिए ।

दुई गोलले पछि परेको मार्सेले बल पोसेसन राखेपनि पीएसजीको बलिया रक्षापङ्ति तोड्न नसक्दा घरमै पराजित हुन पुग्यो । इन्ज्युरी समयको थप गरिएको पहिलो मिनेटमा दिमित्री पायट रातो कार्ड खादै मैदानबाट बाहिरिएपछि घरेलु टोली मार्से १० खेलाडीमा समेटिएको थियो ।

यस खेलमा प्रशिक्षक मोरिसियो पोचेटिनोले नेयमारलाई दोस्रो हाफमा मात्रै मौका दिएको थियो । नेयमार ६५औं मिनेटमा इकार्डीको स्थानमा मैदान छिरेका थिए ।

जितसँगै पीएसजी २४ खेलबाट ५१ अंक जोडेर तेस्रो स्थानमा यथावत रहेको छ । शीर्षस्थानको लिलको ५४ तथा दोस्रो स्थानमा रहेको लियोनको ५२ अंक छ । पराजित मार्से ३३ अंक जोडेर नवौं स्थानमा रहेको छ ।