एजेन्सी – इंग्लिस प्रिमियर लिगमा आज राति विभिन्न चार खेलमा प्रतिस्पर्धा हुँदा शीर्षस्थानमा रहेको म्यानचेस्टर सिटीले टोटेनहम हट्स्परको आतिथ्यता गर्दैछ । खेल राति ११ः१५ बजे इतिहाद स्टेडियममा हुनेछ ।

घरेलु मैदानमा टोटेनहमलाई पराजित गर्दै सिटी आफ्नो शीर्षता थप मजवुत बनाउने लक्ष्यमा हुनेछ । शीर्षस्थानमा रहेको सिटीको २२ खेलबाट ५० अंक छ । पछिल्लो २२ खेलमा अपराजित रहेको सिटी टोटेनहमलाई पराजित गर्दै आफ्नो अपराजित यात्रालाई पनि निरन्तरता दिने योजनामा हुनेछ । सिटी २१ नोभेम्वर २०२० मा टोटेनहमसँग २–० ल पराजित भएयता नै अपराजित छ ।

टोलीसँग रहिम स्टर्लिङ, गाब्रियल जेसस, फिल फोडेन, रोड्री, इल्केए गुन्डोगान, बर्नाडो सिल्भा, रुवेनि डियास, जोओ क्यान्सिलो, जोन स्टोन्स, ओलेक्सान्डर जिन्चेन्को र गोलरक्षक इडर्सन मोराएसको साथ रहेको छ । चोटका कारण केभिन डि ब्रुयन, सर्जियो अगुइरो, नाथन एके र फर्नाडिन्हो अनुपस्थित रहनेछ ।

यता, टोटेनहम पनि सिटीलाई स्तब्ध पार्दै अंक तालिका सुधार गर्ने दाउमा हुनेछ । टोटेनहम सिटीको अपराजित यात्रामा पुर्णविराम लगाउने लक्ष्यमा हुनेछ । टोलीसँग ह्यारी केन, ह्युङ मिन सन, टांगी एनडोम्वेले, पिएरे इमिल होब्जजर्ग, मोउसा सिसाको, इरिक डाएर, टोवी एल्डरवेइरिल्ड र ह्युगो लोरिसको साथ रहेको छ ।

अन्य खेल : लेस्टरविरुद्ध लिभरपुल (साँझ ६ः१५ बजे), क्रिस्टल प्यालेसविरुद्ध बर्नले (राति ८ः४५ बजे) र ब्राइटनविरुद्ध एस्टन भिल्ला (राति १ः४५ बजे)