एजेन्सी – प्रिमियर लिगमा आइतबार जोसे मोउरिन्होको प्रशिक्षणमा रहेको टोटेनहम हट्स्परले अर्को हार बेहोरेको छ । सहरी प्रतिद्वन्द्वी वेष्ट ह्याम युनाइटेडसँग २–१ को हार बेहोरेपछि प्रशिक्षक माउरिन्होमाथि दबाब बढेको छ ।

अघिल्लो दिन लिगको साविक विजेता लिभरपुल एभर्टनसँग २–० ले पराजित भएको थियो । यस्तै अर्को पूर्व विजेता चेल्सी पनि बराबरीमा रोकिएको थियो । पाँचौं मिनेटमा मिचेल एन्टोनियोको गोलबाट वेष्ट ह्यामले घरेलु मैदानमा अग्रता लिएको थियो ।

दोस्रो हाफको सुरुवातमै जेसे लिङगार्डले गोल गरेपछि वेष्ट ह्याम खेलमा थप मजबुत भएको थियो । लिङगार्डले ४७ औं मिनेटमा गोल गरेका थिए । ६४ औं मिनेटमा लुकास मोउराले गोल गरेपछि खेल प्रतिस्पर्धात्मक बनेको थियो । तर, त्यसपछि माउरिन्होको टोलीले गोल थप्न नसक्दा हार स्वीकार्नुपर्यो ।

आइतबारकै अर्को खेलमा फुलह्याम सेफिल्ड युनाइटेडलाई १–० ले हराएको थियो । नवौं स्थानमा रहेको टोटेनहमको उपाधि दौड मात्र होइन अब शीर्ष ४ को दौड पनि कमजोर भएको छ । २४ खेलमा टोलीको ३६ अंक मात्र छ । जबकी शीर्षस्थानको म्यानचेस्टर सिटीको ५६ अंक छ ।

वेष्ट ह्याम भने चेल्सीलाई पछि पार्दै अंक तालिकाको चौथो स्थानमा उक्लेको छ । २५ खेलमा ४५ अंकका साथ वेष्ट ह्याम चौथो स्थानमा छ । एक खेल कम खेलेको तेस्रो स्थानमा रहेको म्यानचेस्टर युनाइटेडको ४६ अंक छ । लेस्टर ४९ अंकका साथ दोस्रो स्थानमा छ ।