एजेन्सी – म्यानचेस्टर युनाइटेडले प्रिमियर लिगमा रेलिगेसन क्षेत्रबाट एक स्थान माथि रहेको न्युक्यासललाई आइतबार पराजित गरेको छ । ३–१ को जितपछि युनाइटेड पुनः अंक तालिकाको दोस्रो स्थानमा उक्लेको छ ।

युनाइटेडको जितमा मार्कस रासफोर्डको भूमिका महत्वपूर्ण रह्यो । इग्ल्यान्ड फरवार्डले ३० औं मिनेटमा गोल गर्दै घरेलु टोलीलाई अघि बढाएका थिए । जारी सिजनमा रासफोर्डको त्यो १८ औं गोल थियो ।

कोरोना भाइरसको लक्षण देखिएपछि दुई महिनापछि मैदानमा फर्केका एलान सेन्ट म्याक्समिनले ३६ औं मिनेटमा गोल गर्दै न्युक्यासलाई खेलमा फर्काएका थिए । न्युक्यासलले दोस्रो हाफको सुरुवातमै गोलको मौका पाएको थियो ।

५७ औं मिनेटमा डानियल जेम्सले गोल गरेपछि युनाइटेडले खेलमा पुनः अग्रता बनाएको थियो । त्यो अग्रतापछि न्युक्यासल खेलमा कमजोर हुँदै गायो । ब्रुनो फर्नान्डेसले ७५ औं मिनेटमा पेनाल्टीमा गोल गर्दै टोलीको जितलाई सहज बनाए । सिजनमा त्यो उनको २२ औं गोल हो ।

न्युक्यासलले लिगका पछिल्ला १० खेलमा ८ खेल गुमाएको छ । न्युक्यासलको रेलिगेसन क्षेत्रमा रहेको फुलह्याम भन्दा ३ अंक बढी छ । युनाइटेडको भने लिगको पछिल्ला ६ खेलमा यो दोस्रो जित हो । दोस्रो स्थानमा फर्केपनि शीर्षस्थानको म्यानचेस्टर सिटीको भन्दा युनाइटेडको १० अंक कम छ । आइतबार नै सिटीले आर्सनललाई १–० ले हराएको थियो ।