काठमाडौं (हाम्रो खेलकुद)– नेपाली राष्ट्रिय फुटबल टोलीले विश्वकप छनोट अन्तर्गत आफ्ना बाँकी खेल दशरथ रंगशालामा खेल्ने भनिएपनि कोरोना संक्रमणका कारण अब तीनै कुवेतमा खेल्ने भएको छ ।

कोभिड १९ कै  कारण पटक पटक सर्दै आएको विश्व कप छनोटका विषयमा एसियाली फुटबल महासंघ (एएफसी) ले शुक्रबार सेन्ट्रल भेन्यू टुंगाएको छ । विश्वकप र एएफसी एसियन कप समेतको छनोट रहेको खेलको तालिका मे ३१ देखि जुन १५ (२०७८ जेठ १७ देखि असार १ गते) सम्मका लागि तय भएको एएफसीले आफ्नो वेबसाइटमा उल्लेख गरेको छ । विश्व कप छनोटमा नेपालसँगै समूह ‘बी’ मा कुवेत, अष्ट्रेलिया, जोर्डन र चाइनिज ताइपेइ रहेका छन् ।

नेपालले कुवेतसँग दुवै खेल खेलिसकेको छ भने बाँकी टोलीसँग अवे खेल खेलेको थियो । यसै वर्षको असोजका लागि तय छनोट खेल कोभिड १९ कारण चैतका लागि सारिएको थियो । चैतमा हुने भनिएको खेलपनि पछि नहुने भन्दै एएफसीले नयाँ मिति र सेन्ट्रल भेन्यू तय गरेको हो ।

नेपालले छनोटका ५ मध्ये ४ खेलमा हार र १ खेलमा जित हासिल गरेको थियो । चाइनिज ताइपेलाई २–० ले हराएको नेपालले कुवेतसँग पहिलो लेगमा ७–० र दोस्रोमा १–०, अष्ट्रेलियासँग ५–० र जोर्डनसँग ३–० ले पराजित भएको थियो । दशरथ रंगशाला तयार नभएका कारण नेपाल र कुवेतबीचको दोस्रो खेल भुटानमा भएको थियो ।

विश्व कप छनोटका लागि एएफसीले समूह ‘ए’ को खेल चीन, ‘सी’ को बहराईन, समूह ‘डी’ को साउदी अरेबिया, समूह ‘इ को कतार, समूह ‘एफ’ को जापान, समूह ‘जी’ को यूएई र समूह ‘एच’ को दक्षिण कोरियाका लागि सेन्ट्रेल भेन्यू तय गरेको छ ।