एजेन्सी – जर्मन बुन्डेस लिगामा शीर्षस्थानमा रहेको बायर्न म्युनिख र बोरुसिया डर्टमुन्डले सफलता हात पारेका छन् । बायर्नले वेर्डर ब्रेमेनमाथि उसकै मैदानमा ३–१ को सहज जित हात पारेको हो ।

बायर्नको जितमा लियोन गोरेट्जका, रोबर्ट लेवान्डोस्की र सर्ज जिनाब्रीले गोल गरे । घरेलु टोलीका निकलस फुलक्रगले एक गोल फर्काए । खेलको २२औं मिनेटमा थोमस मुलरको पासमा लियोन गोरेट्जकाले गोल गर्दै बायर्नलाई १–० को अग्रता दिलाए ।

३५औं मिनेटमा सर्ज जिनाब्रीले मुलरकै पासमा गोल गर्दै बायर्नलाई पहिलो हाफमा २–० को अग्रता दिलाए । ६७औं मिनेटमा रोबर्ट लेवान्डोस्कीले गोल गर्दै बायर्नलाई ३–० ले अघि बढाए । ८६औं मिनेटमा निकलस फुलक्रगले एक गोल फर्काएपनि हार टार्न सकेन ।

जितसँगै शीर्षस्थानमा रहेको बायर्नको २५ खेलबाट ५८ अंक पुगेको छ । पराजित वेर्डर ब्रेमेन ३० अंक जोडेर १२औं स्थानमा रहेको छ ।

बुन्डेस लिगाकै अर्काे खेलमा बोरुसिया डर्टमुन्डले हर्था बर्लिनलाई २–० को पराजित गरेको छ । डर्टमुन्डको जितमा जुलियन ब्रान्ड र युसोउफा मौकाकोले गोल गरे । ८०औं मिनेटमा भ्लादिमिर दारिदा सिधै रातो कार्ड खादै मैदानबाट बाहिरिएपछि हर्था १० खेलाडीमा समेटिएको थियो ।

जितपछि डर्टमुन्ड २५ खेलबाट ४२ अंक जोडेर पाँचौ स्थानमा उक्लिएको छ । पराजित हर्था २१ अंक जोडेर १५औं स्थानमा रहेको छ ।