पोखरा (हाम्रो खेलकुद) – लामो समय देखि विवादमा रहँदै आएको कास्की जिल्ला फुटबल संघमा फेरी अर्को चर्चाको विषय सुरु भएको छ ।

कास्की जिल्ला फुटबल संघकी कोषाध्यक्ष विजया गुरुङले अध्यक्ष मिलन गुरुङको दबाबको कारण राजिनामा दिएकी छन् । अध्यक्ष गुरुङले बारम्बार अक्षय कोषको रकम निकाल्न दबाब दिएको र नमानेपछि पद छाड्न भन्दै चर्किएपछि राजिनामा दिएको स्रोतले बताएको छ । उता कोषाध्यक्ष गुरुङले भने पारिवारीक कारण देखाउँदै राजिनामा दिएको बताएकी छिन् ।

पोखराको टुडिखेल मैदानमा संचालन भएको १४ औँ संस्करणको विटि कपको समयमा समेत अध्यक्षले रकम झिक्न निकै अनुरोध गरेको स्रोतले हाम्रो खेलकुदलाई जानकारी दियो । ‘अध्यक्षले बारम्बार रकम चलाउनु पर्यो भन्ने रहेछन् । नमानेपछि अर्को राख्छौं राजिनामा दिनु भनेपछि राजिनामा दिएको हो,’ स्रोतले भन्यो । अध्यक्ष गुरुङले राजिनमा समेत एकलौटि रुपमा स्विकृत गरेको स्रोतले बताए ।

कोषाध्यक्ष विजया गुरुङले भने आफुले राजिनामा दिएपनि फुटबल खेलको विकासका लागि सधैं लागिपर्ने बताइन् । अध्यक्ष मिलन गुरुङले दशौँ बगर भाइखलक एट ए साइट फुटबल प्रतियोगिता संचालन हुदैँ गर्दा राजिनामा स्विकृत गरेका थिए । राजिनामा स्विकृत कार्यसमितिको बैठकले गर्नुपर्ने भएपनि अध्यक्ष आफैंले स्विकृत गरेको स्रोतले बताए।