काठमाडौं (हाम्रो खेलकुद)– अखिल नेपाल फुटबल संघ (एन्फा) ले हस्पिटल पार्टरका रुपमा नेपाल मेडिसिटी अस्पतालसँग सम्झौता गरेको छ । एन्फाले राष्ट्रिय खेलाडी र ‘ए’ डिभिजन लिगका खेलाडीको ५ लाख रुपैयाँको दुर्घटना विमा प्रभु इन्स्युरेन्स कम्पनीमा गराएको आइतबार सम्झौता कार्यक्रममा जानकारी दिइयो ।

विमा रकमका लागि यसअघि खेलाडीले पाउने गरेको दुःखलाई मध्यनजर गर्दै सिधै इन्स्युरेन्सबाट अस्पातालले भुक्तानी लिने सम्झौतामा उल्लेख भएको एन्फा प्रवक्ता किरण राईले जानकारी दिए । ‘बी’ र ‘सी’ डिभिजनका खेलाडीका लागि ३ लाख रुपैयाँ तथा अन्य खेलाडी, एन्फासँग सम्बन्धित कर्मचारीहरुलाई भने १ लाख ५० हजार रुपैयाँको दुर्घटना विमा गरिएको छ ।

सम्झौता पत्रमा मेडिसिटीका महाप्रबन्धक विजय रिमाल र एन्फाका स्वास्थ्य समिति संयोजक निरज खड्गीले हस्ताक्षर गरे । एन्फाले विमाका लागि प्रत्येक खेलाडीको वार्षिक १ हजार ५ सय रुपैयाँ प्रभु इन्स्युरेन्सलाई भुक्तानी दिनुपर्ने राईले जानकारी दिए ।

विगतमा दुर्घटना विमाको रकम दाबी गर्नका लागि खेलाडीहरुले निकै धाउनु परेको अनुभव हामीसँग छ, एन्फा प्रवक्ता राईले भने,‘त्यसको अन्त्यका लागि हामीले यो सम्झौता गरेका हौं । अब खेलाडीको उपचारका लागि विमाको रुकमले कभर गर्ने भुक्तानी अस्पतालले सिधै प्रभु इन्स्युरेन्ससँग दाबी गर्नेछ ।’

मेडिसिटीका महाप्रबन्धक रिमालले पनि विमित खेलाडीको उपचार खर्च सोझै प्रभुसँग भुक्तानी लिइने उल्लेख गर्दै भने,‘प्रभु र हाम्राबीचमा त्यो सम्झौता पहिलादेखि नै छ ।’ उनले मेडिसिटीले स्पोर्टस मेडिसिनलाई सुरुवातबाट प्राथमिकतामा राखेको उल्लेख गर्दै खेलाडीहरुको उपचारका लागि अस्पतालमा सबै खाले सुविधा रहेको बताए ।

‘फिजियोथेरापीसँगै फुड एन्ड न्यूट्रेसनमा पनि हामी खेलाडीलाई सल्लाह दिनेछौं, उनले भने,‘फुटबल खेलाडी र परिवारको हकमा अस्पतालको तर्फबाट सहयोग रहनेछ ।’ एन्फाले आयोजना गर्ने प्रतियोगितामा खेल स्थलमा मेडिकल टोली र एम्बुलेसन्स पनि अस्पतालले उपलब्ध गराउने महाप्रवन्धक रिमालले जानकारी दिए ।