एजेन्सी – इटालियन सिरी ए अन्तर्गत साविक विजेता युभेन्टस आफ्नै मैदानमा बेनेभेन्टोसँग पराजित भएको छ । शनिबार भएको खेलमा युभेन्टसले पहिलो रोजाइकै टोली उतारेपनि १६ औं स्थानको बेनेभेन्टोसँग १-० को हार बेहोरेको हो ।

बल पोसेसनमा दबाब कायम गर्दै लगातार आक्रमण बुनेपनि युभेन्टसले खेलमा गोल गर्न सकेन । पाहुना टोलीका लागि अडोल्फो गाइचले ६९ औं मिनेटमा गरेको गोल नै निर्णायक सावित भयो । उनले पेनाल्टी क्षेत्रको ठिक बाहिरबाट गरेको प्रहार गोलमा परिणत भएको थियो ।

युभेन्टसले खेलमा पछि परेपछि एक पछि अर्को गोल गर्ने अवसर सदुपयोग गर्न सकेन । गोलरक्षक लोरेन्जो मोन्टिपोले केहि सुन्दर बचाउ गर्दै टोलीलाई अनपेक्षित जित दिलाए । उनले अन्तिम ५ मिनेटमा मात्र क्रिस्टियानो रोनाल्डोको दुई प्रहार विफल पारेका थिए ।

खेल सुरु हुनुअघि रोनाल्डोलाई विशेष जर्सी पाएका थिए । रोनाल्डोले पेलेको सर्वाधिक गोलको किर्तिमान तोडेको अवसरमा ७ सय ७० गोल तथा गोट (ग्रेटेस्ट अफ अल टाइमअर्थात इतिहासकै सर्वोत्कृष्ट खेलाडी ) अंकित जर्सी हस्तान्तरण गरिएको थियो ।

यस हारले युभेन्टसको उपाधि रक्षा गर्ने लक्ष्यमा भने ठूलो धक्का लागेको छ । इन्टर मिलानले २७ खेलमा ६५ अंक जोड्दा युभेन्टस २७ खेलमा ५५ अंकसहित तेस्रो स्थानमा छ । दोस्रो स्थानको एसी मिलानको ५६ अंक छ । चौथो स्थानको एटलान्टाले २८ खेलमा ५५ अंक नै जोडेको छ ।