सुबास हुमागाईं, काठमाडौं

थ्री नेसन्स कपमा पहिलो खेलको पूर्वसन्ध्यामा प्रशिक्षक बालगोपाल महर्जनले नेपालको २३ सदस्यीय टोली घोषणा गरे । महर्जनले घोषणा गरेको टोलीमा मुख्य फरवार्डका रुपमा भरत खवास मात्र छन् । तर प्रशिक्षक महर्जन मिडफिल्ड हेभी देखिएपनि आक्रमणमा खेल्न सक्ने खेलाडी रहेकाले समस्या नहुने बताउँछन् ।

नेपाली टोलीमा लामो समयदेखि आक्रमण सम्हालिरहेका फरवार्ड नवयुग श्रेष्ठ देखिएनन् । नवयुग टोलीमा नपर्नुको कारणबारे सोध्दा महर्जनले उनीमात्र नभएर अन्य खेलाडी पनि टोलीमा नरहेको भन्दै प्रष्ट जवाफ दिन चाहेनन् । उनले यो प्रतियोगिता विश्वकप छनोटका खेलका लागि तयारीका रुपमा मात्र भएकाले अन्य खेलाडी पनि नरहेको बताए ।

‘अन्य खेलाडी पनि टोलीमा छैनन् । थ्री नेसन्स प्रतियोगिता विश्वकप छनोटको तयारीका रुपमा मात्र रहेको छ । अब यो प्रतियोगिता सकिएपछि बाहिरिएका खेलाडी फेरी समावेश हुनेछन् र तयारी गर्नेछौं । उनीहरुले त्यहाँ आफ्नो प्रदर्शन सुधारेर टोलीमा फर्कने सम्भावना छ,’ महर्जनले भने ।

महर्जनले यसो भनिरहँदा नेपालको वर्तमान टोलीमा मुख्य फरवार्डका रुपमा खेलिरहेका खेलाडीका रुपमा आर्मीका कप्तान भरत मात्र छन् । त्यसो त भरतले पनि लगातार मुख्य फरवार्डको भूमिका निभाएका छैनन् । घरेलु फुटबलमा आर्मी होस् या राष्ट्रिय टोलीले उनले विङ्गमा पनि खेलेका छन् । महर्जनले अन्जन विष्ट र दर्शन गुरुङले उक्त पोजिसनमा खेल्न सक्ने बताएपनि दुवै नियमित विङ्गमा खेल्दै आएका हुन् ।

फरवार्डका रुपमा रहेका अर्का खेलाडी अभिषेक रिजालले पनि राष्ट्रिय टोलीबाट कुवेतविरुद्ध आक्रमण सम्हालेका थिए । तर त्यस खेलमा उनको प्रदर्शन बिर्सनलायक थियो । क्लब फुटबलमा उनी भर्खर भारतको आइलिगमा आइज्वाल एफसीबाट खेलेर फर्किएका छन् । आइलिगका ५ खेल खेलेका उनले एक खेलमा सुरुवाती रोजाइमा खेलेका थिए । सबै खेलमा उनी विंगरकै भूमिकामा थिए । राष्ट्रिय टोलीमा उनले प्रशिक्षण गरेको केहि दिन मात्र भएको छ ।

महर्जनले ३३ खेलाडीबाट २३ खेलाडी छनोट गर्दा नवयुगसँगै अर्का फरवार्ड आशिष लामालाई पनि टोलीमा राखेनन् । ए डिभिजन लिगका सर्वाधिक गोलकर्ता रहेका उनले त्यसअघि नोभेम्बरमा भएको बंगलादेशविरुद्ध सिरिज पनि गुमाएका थिए । इतिहासमै आक्रमणमा कमजोर रहेको टोलीले घरेलु मैदानमा भएको प्रतियोगितामा एकमात्र ‘आउट एन्ड आउट’ फरवार्ड राख्दा मुख्य रणनीतिमा असर नपरेपनि विकल्पमा भने कमी आउने देखिन्छ ।

डिफेन्समा पनि युवा डिफेन्डर विकास खवास टोलीमा नहुनुले समर्थकबाट केहि प्रश्न खडा भएको देखिन्छ । बंगलादेशविरुद्ध भएको मैत्रीपूर्ण खेलमा उच्च प्रदर्शन गरेका उनले दक्षिण एसियाली खेलकुदमा पनि धेरैको मन जितेका थिए । अहिले डिफेन्समा देवेन्द्र तामाङ घाइते हुनु र अनन्त तामाङ पूर्णत फिट नहुनुले उनले अवसर पाउने देखिएको थियो । तर महर्जनले उनलाई बाहिर राख्दै टोलीमा छिरिङ गुरुङलाई समेटेका छन् । राइट ब्याकका रुपमा छिरिङसँगै विराज महर्जन र दीनेश राजवंशी पनि रहेका छन् । दिनेशले पहिलो रोजाइमा खेल्ने सम्भावना बढी देखिन्छ ।

मिडफिल्डमा त्रिदेव गुरुङको समावेशीले पनि धेरैलाई अचम्मित पारेको छ । प्रशिक्षक महर्जनले त्रिदेवसँगै सन्जोग र निशानलाई टोलीमा समेट्नुको कारण उनीहरुको प्रदर्शनमा एकरुपता हुनु नै रहेको बताए । ‘ अहिले प्रशिक्षणमा मात्र नभएर त्यसअघि देखि नै मैले उनीहरुलाई नजिकबाट नियालेको थिएँ । अहिले टोलीमा परेका छन् । अब उनीहरु सिधै खेल्ने वा नखेल्ने त भन्न सकिन्न तर योजनामा भने छन्,’ उनले थपे ।

कप्तान किरण चेम्जोङले पनि छनोटका क्रममा प्रशिक्षकहरुले राम्रो निर्णय गरेको बताए । ‘प्रशिक्षकहरु लामो समयदेखि टोलीसँग नै हुनुहुन्छ । वहाँहरुले सहि निर्णय लिनुभएको छ भन्ने मैले मानेको छु । कोहि समर्थकलाई आफ्नो खेलाडी नपर्दा दुख लाग्ला, तर प्रशिक्षकको निर्णय राम्रो नै छ । खेलाडी प्रदर्शनको आधारमा टोलीमा पर्ने हो नामको आधारमा होइन, कप्तान किरणले भने ।

विगतमा सेन्टर मिडफिल्ड सम्हाल्दै आएका रोहित चन्दले डिफेन्डरका रुपमा खेल्ने पक्काजस्तै छ । उनीसँग अनन्त तामाङलाई खेलाउने वा नखेलाउने भन्ने दुविधामा पनि प्रशिक्षक महर्जन छन् । गत साता मात्र प्रशिक्षणमा फर्केकाले महर्जनले दोस्रो खेलमा मात्र उनलाई प्रयोग गर्न सक्छन् । तर रोहितसँग खेल्न सेन्टर डिफेन्सको अन्य उचित विकल्प नहुँदा अनन्तलाई लिएर जोखिम लिनुपर्ने अवस्था छ । लेफ्ट डिफेन्समा रन्जित धिमाल र राइट डिफेन्समा दीनेशकै सम्भावना देखिन्छ ।

मिडफिल्डमा भने तेज तामाङ खेल्ने लगभग पक्का छ ।त्यसपछि भने महर्जनले कुन रणनीति अपनाएर मिडफिल्ड उतार्छन् भन्ने हेर्न बाँकी छ।अघिल्लो दिन पनि आफ्नो रणनीतिबारे प्रष्ट हुन नचाहेका महर्जन अंक जोड्नकै लागि खेल्ने भनिरहेका थिए । ‘हामी अंक जोड्न खेल्नेछौं ।खेलको अवस्था अनुसार ३ अंक वा १ अंक भन्ने योजना हुनेछ । रणनीतिबारे भने अहिले केहि भन्ने अवस्था छैन,’ उनले थपे ।

सेन्टर मिडफिल्डमा विशाल राई र एरिक विष्ट तेजको पार्टनरका रुपमा खेल्न तयार छन् । त्यसो त विगतमा सुजल श्रेष्ठलाई पनि उक्त भूमिकामा उतारिएको थियो । सुजल पनि चोटबाट फर्कंदै गरेका कारण सुरुवातमै नखेल्न सक्छन् । विङ्गमा नयाँ अनुहार त्रिदेव र सन्जोगसँगै रवी पासवान र सुनिल बल विकल्पका रुपमा छन् । भरत खवास एकल फरवार्ड भएपनि ४-४-२ को फर्मेसनमा उत्रिए अन्जन वा अभिषेकले उनलाई साथ दिनेछन् ।

नेपालले प्रतियोगिताको पहिलो खेलमा किर्गिस्तानसँग खेल्दा फाइनलमा स्थान बनाउने अवसर पनि छ । जित हासिल गरे नेपाल र बंगलादेश शनिबार समूह चरणको अन्तिम खेल र सोमबार फाइनल खेल्नेछन् । बराबरीको हकमा भने नेपालले अन्तिम खेलमा हार टारेमात्र पनि फाइनलमा स्थान पक्का गर्नेछ । पहिलो खेलमा किर्गिस्तानको प्रदर्शन अपेक्षा गरेभन्दा कमजोर रहेको महर्जनले बताएका छन् । तर विपक्षी टोली अब जित हासिल गर्नैपर्ने दबाबमा रहेकाले उनी त्यसबारे सचेत छन् ।

प्रशिक्षक महर्जन र कप्तान किरणको पूरा अन्तर्वार्ता :

नेपाली टोली :

गोलरक्षक – किरण कुमार लिम्बु (कप्तान), विकेश कुथु र दिप कार्की

डिफेन्डर – रन्जित धिमाल, निशान खड्का, रोहित चन्द, अनन्त तामाङ, दिनेश राजवंशी, अजित भण्डारी, विराज महर्जन र छिरिङ गुरुङ

मिडफिल्डर – त्रिदेव गुरुङ, सुजल श्रेष्ठ, तेज तामाङ, एरिक बिष्ट, सन्जोक राई, विशाल राई, सुनिल बल, रवि शंकर पासवान

फरवार्ड – अन्जन विष्ट, दर्शन गुरुङ, अभिषेक रिजाल र भरत खवास