एजेन्सी – अन्सु फाती बार्सिलोना र स्पेनका लागि एक महत्वपूर्ण खेलाडीका रुपमा स्थापित हुने क्रममा थिए । ला लिगा, च्याम्पियन्स लिग वा अन्तर्राष्ट्रिय फुटबलमा पनि उनीबाट धेरै अपेक्षा गरिएको थियो । फातीबाट धेरै गोलको आशा गरिएको थियो ।

तर, दुर्भाग्य नोभेम्बरमा उनको बायाँ घुँडामा चोट लाग्यो । तत्काल उनको शल्यक्रिया भयो । तर, अहिले उनीको पूनरागमन भने योजना अनुसार नहुने देखिएको छ । उनको पूनरागमनका लागि क्लब आशावादी रहेपनि कहिले फर्कन्छन् भन्ने यकिन भएको छैन ।

रियल बेटिससँगको खेलका दौरान नोभेम्बर ७ मा फातीको घुँडामा चोट लागेको थियो । त्यसको दुई दिन पछि उनको घुँडाको शल्यक्रिया भएको थियो । १८ वर्षे प्रतिभावान खेलाडीले चार महिनामा पूनरामगन गर्ने अपेक्षा गरिएको थियो । तर त्यो भन्दा बढी पनि उनले प्रतिक्षा गर्नुपर्ने अनुमान गरिएको थियो । तर सोचे जस्तो उनी मैदानमा फर्कने सम्भावना कम रहेको बताइएको छ ।

थुप्रै विशेषज्ञले उनको चोटको अवस्थाका बारेमा हेरिएको बताएको छ । तर पूनरागमनको मिति भने तय भएको छैन । बार्सिलोनाले पनि उनको पूनरागमनका लागि हतार गरेको छैन । कारण उनी टोलीका महत्वपूर्ण खेलाडी हुन् । त्यसैले बार्सिलोना उनलाई लिएर जोखिम मोल्न चाहदैन ।

बार्सिलोनामा उनको सम्झौता सन् २०२२ सम्म रहेको छ । क्लबले उनीसँगको सम्झौता बढाउन चाहिररहेको छ । रोनाल्ड कोम्यानको प्रशिक्षणमा १४ खेल खेल्दै फातीले ६ गोल गरेका थिए ।