काठमाडौं(हाम्रो खेलकुद)– नैकाप गोल्डकपमा सोमबार मिरमिरे युवा क्लब, स्वप्नबाग वेस्टर्न युनाइटेड र ढुंगेअड्डा युनेस्को विजयी हुँदै दोस्रो चरणमा पुगेका छन् ।
चन्द्रागिरी नगरपालिकाको नैकाप मैदानमा मिरमिरेले हाम्रो चिसापानी साकासललाई २–० ले हराएको थियो । मिरमिरेका लागि विप्लप शाह र सुदन कार्कीले गोल गरेका थिए । विजयी टोलीका अभय राना खेलको म्यान अफ दी म्याच घोषित भए ।
सञ्जिव महर्जनको दुई गोलको मद्दतमा स्वप्नबागले सेतिदेवी युवा क्लब गोर्खालीलाई ३–० ले हरायो । विजयी टोलीका लागि पहिलो गोल सुवास घलानले गरेका थिए । स्वप्नबागका अनिष महर्जन खेलको म्यान अफ दी म्याच बने ।
अभय रानालाई म्यान अफ दी म्याच ट्रफी हस्तान्तर गर्दै राष्ट्रिय टोलीका पूर्व खेलाडी रमेश बुढाथोकी ।
३–३ को बराबरीपछि पेनाल्टी सुटआउटमा ढुंगेअड्डाले नैकाप युवा क्लबलाई पराजित गरेको थियो । निर्धारित समयमा ढुंगेअड्डाका समिर कार्की, अभिषेक रिजा र सुनिल बस्नेतले गोल गरे । त्यस्तै नैकापका लागि सुनिल तामाङ, हेमन्त केसी र राहुल श्रेष्ठले गोल गरे । टाइब्रेकरमा ढुंगेअड्डा ११–१० ले विजयी भयो । नैकापका गोलकिपर विमल श्रेष्ठ खेलको म्यान अफ दि म्याच बने ।
