एजेन्सी – पोर्चुगिज सुपरस्टार तथा कप्तान क्रिस्टियानो रोनाल्डोले खेल दौरान फालेको कप्तानको आर्मब्यान्ड आर्थिक संकलनका लागि अक्सनमा राखिने भएको छ ।

कतार विश्वकप २०२२ को युरोपियन छनोट दौरान सर्वियाविरुद्धको खेल दौरान आफ्नो गोललाई मान्यता नदिएपछि आक्रोशमा आएका रोनाल्डोले आफुले लगाएको कप्तानको आर्मब्यान्ड फाल्दै मैदानबाट बाहिरिएका थिए ।

कप्तानको आर्मब्याण्ड एक बिरामी बच्चाको उपचारको लागि लागि आर्थिक संकलनका लागि अक्सनमा राखिने भएको हो । स्पोर्ट्स क्लब नाम गरेको च्यानलले म्याचको रिप्ले हेर्दै रोनाल्डोकै आर्मब्याण्ड रहेको पुष्टि गरेपछि एक च्यारिटी संस्थासँगै उक्त आर्मब्याण्डलाई अक्सनमा राखेको छ ।

बेलग्रेडमा भएको खेलमा रोनाल्डोको प्रहार गोललाईन क्रस गरेको देखिएपनि स्टेफन मित्रोभिचले क्लियरेन्सलाई जायज मान्दै रेफ्रीले रोनाल्डोको गोललाई मान्यता दिइएको थिएन । भिडियो असिस्टेन्ट रेफ्री (भिएआर) को प्रयोग नभएका कारण पोर्चुगलले गोलको मान्यता नपाउदा पोर्चुगल जितबाट बञ्चित बनेको थियो । उक्त गोलको लागि रेफ्रीसँग विवादमा उत्रिएपछि उनलाई पहेलो कार्ड देखाइएको थियो ।

उनले फालेको आर्मब्याण्ड मैदानमा रहेका स्टेवार्डले उठाउदै क्षेत्रीय टेलिभजन च्यानललाई फोन गर्दै अक्सनमा राख्नका लागि आग्रह गरेका थिए । आफ्नो पहिचान खुलाउन नचाहेका उनले उक्त अक्सनबाट उठेको रकम दुर्लभ रोग लागेका एक ६ महिने बालक ग्राभिलो जुर्डेभिचको उपचारमा खर्च गर्ने बताएका छन् ।

‘रोनाल्डोले म भन्दा तीन मिटर पर मात्रै आर्मब्याण्ड फालेका थिए । त्यो देख्ने बित्तिकै मलाई ती बिरामी बच्चाको लागि पैसा उठाउएर सदुपयोग गर्ने सोच आयो ।’ ति व्यक्तिले भने । बच्चालाई स्पाइनल मस्कुलर अट्रोफि रोग लागेको छ । यसको उपचारको लागि बिश्वकै सबैभन्दा महँगो औषधी जोल्गेन्स्मा जसको मुल्य २० लाख युरोको आवश्यकता पर्दछ ।