एजेन्सी – क्रिस्टियन पुलिसिसले दुई गोल तथा काई हाभर्टजले एक गोल र अर्काे असिस्ट दिएपछि इंग्लिस प्रिमियर लिगमा लन्डन क्लब चेल्सीले क्रिस्टल प्यालेसमाथि सानदार जित हात पारेको छ ।

चेल्सीले क्रिस्टल प्यालेसलाई उसकै मैदानमा ४–१ को फराकिलो हार चखाएको हो । चेल्सीको फराकिलो जितमा क्रिस्टियन पुलिसिसले दुई गोल गर्दा काई हाभर्टज र कोर्ट जोउमाले समान एक गोल गरे । प्यालेसका क्रिस्टियन बेन्टेकेले एक गोल फर्काए ।

सेलह्रस्ट पार्क लन्डनमा शनिबार राति भएको खेलमा पाहुना टोली चेल्सीले खेलको आठौं मिनेटमा काई हाभर्टजको गोलबाट अग्रता लिएको थियो । उनले कलुम हड्सन ओडोइको पासलाई सदुपयोग गरेका थिए । १०औं मिनेटमा क्रिस्टियन पुलिसिसले काई हाभर्टजको पासमा गोल गर्दै चेल्सीको अग्रता दोब्बर पारे ।

३०औं मिनेटमा मासन माउन्टको पासमा कोर्ट जोउमाले गोल गरेपछि चेल्सीले ३० मिनेट भित्र नै ३–० को आरामदायी अग्रता बनाएको थियो । ६३औं मिनेटमा क्रिस्टियन बेन्टेकेले गोल गर्दै खेललाई ३–१ को अवस्थामा ल्याए । उनले जेफरेको पासलाई सदुपयोग गरेका थिए । ७८औं मिनेटमा क्रिस्टियन पुलिसिसले व्यक्तिगत दोस्रो तथा टोलीका लागि चौथो गोल गर्दै चेल्सीलाई ४–१ को फराकिलो जित दिलाए ।

जितसँगै चेल्सी ३१ खेलबाट ५४ अंक जोडेर शीर्ष चारमा यथावत रहेको छ । पराजित क्रिस्टल प्यालेस ३८ अंक जोडेर १३औं स्थानमा रहेको छ ।