एजेन्सी – भेट्रान फरवार्ड ज्लाटन इब्राहिमोभिचले रातो कार्ड पाएको खेलमा एसी मिलानले इटालियन सिरी ‘ए’ मा पार्मालाई उसकै मैदानमा ३–१ ले पराजित गरेको छ ।

पार्मामा शनिबार राति भएको खेलमा मिलानको जितमा एन्टी रेविच, फ्रान्क केस्सी र राफयल लियोले गोल गर्दा घरेलु टोलीका रिकार्डाे गाग्लिओलोले गोल फर्काए । खेलको आठौं मिनेटमा एन्टी रेविचको गोलबाट मिलानले अग्रता लिएको थियो । उनले ज्लाटन इब्राहिमोभिचको पासमा गोल गरेका थिए । ४४औं मिनेटमा फ्रान्क केस्सीले थियो हर्नान्डेजको पासमा गोल गर्दै मिलानलाई पहिलो हाफमा २–० को अग्रता दिलाए ।

६०औं मिनेटमा ज्लाटन सिधै रातो कार्ड खाँदै मैदानबाट बाहिरिएपछि मिलानले अन्तिम ३० मिनेट १० खेलाडीमा रहेर खेलेको थियो । हकान कलहानो ग्लुले रिकार्डाे गाग्लिओलोलाई फल गरेपछि फ्रिकिक दिदा ज्लाटनले रेफ्रीलाई अनावश्यक गाली गरेपछि रेफ्री फावियो मारेस्काले ज्लाटनलाई सिधै रातो काडै देखाउँदै मैदान बाहिर पठाएको थियो ।

त्यसपछि ६६औं मिनेटमा रिकार्डाे गाग्लिओलोले गोल गर्दै खेललाई २–१ को अवस्थामा ल्याउँदै पार्मालाई खेलमा फर्काउने संकेत दिएको थियो । तर, त्यसपछि मिलानले इन्ज्युरी समयको थप गरिएको चौथो मिनेटमा गोल गर्दै जित पक्का गरे । राफयल लियोले डिएगो डालोटको पासमा गोल गरेका थिए ।

यो जितसँगै दोस्रो स्थानमा रहेको मिलानको ३० खेलबाट ६३ अंक पुगेको छ । मिलान शीर्षस्थानको इन्टर मिलानभन्दा ८ अंकले पछि छ । एक खेल कम खेलेको इन्टरको ७१ अंक छ । पराजित पार्मा २० अंक जोडेर १९औं स्थानमा छ ।