एजेन्सी – जर्मन बुन्डेसलिगामा बोरुसिया डर्टमुन्डले पूनरागमन जित निकाल्दा लिग लिडर बायर्न म्युनिख बराबरीमा रोकिएको छ ।
एक गोलले पछि परेको अवस्थामा डर्टमुन्डले घरेलु टोली भिएफबी स्टुटगार्टमाथि ३–२ को रोमाञ्चक जित निकालेको हो ।

डर्टमुन्डका जुडे बेलिङघम, मार्काे रिउस र अन्सगर नाउफले गोल गर्दा घरेलु टोली स्टुटगार्टका सासा कालजजिक र ड्यानियल डिडाभीले गोल फर्काए । डर्टमुन्ड खेलको १७औं मिनेटमा सासाको गोलबाट पछि परेको थियो । ४७औं मिनेटमा जुडे बेलिङघमले जियोभानी रेनाको पासमा गोल गर्दै डर्टमुन्डलाई खेलमा फर्काएका थिए ।

५२औ मिनेटमा कप्तान मार्काे रिउसले गोल गर्दै बायर्नलाई २–१ ले अघि बढाए । उनले माटिउ मोरेको पासलाई सदुपयोग गरेका थिए । ७८औं मिनेटमा ड्यानियल डिडाभीले टांगी कोउलीवालीको पासमा गोल गर्दै खेललाई २–२ गोलको बराबरीमा ल्याए । ८०औं मिनेटमा अन्सगरले एर्लिङ ब्राउट हालान्डको पासमा गोल गर्दै डर्टमुन्डलाई ३–२ को जित दिलाए ।

जितसँगै पाँचौ स्थानमा रहेको डर्टमुन्डको २८ खेलबाट ४६ अंक पुगेको छ । डर्टमुन्ड शीर्ष चारको फ्रान्कफुर्टभन्दा ७ अंकले पछि छ । पराजित स्टुटगार्ट ३९ अंक जोडेर नवौं स्थानमा रहेको छ ।

अर्काे खेलमा शुरुवाती अग्रता जोगाउन नसक्दा लिग लिडर बायर्न म्युनिख युनियन बर्लिनसँग १–१ गोलको बराबरीमा रोकिएको छ ।
बायर्नबा जमन मुसिएलाले ६८औं मिनेटमा थोमस मुलरको पासमा गोल गर्दा ८६औं मिनेटमा युनियन बर्लिनका मार्कुस इंग्भार्टसेनले रोबर्ट एन्डरिचको पासमा बराबरी गोल फर्काएका थिए ।

बराबरीपछि शीर्षस्थानको बायर्नको २८ खेलबाट ६५ अंक पुगेको छ । बायर्नले शीर्षस्थानमा आरबी लाइप्जिगलाई ५ अंकले पछि पारेको छ । लाइप्जिगको ६० अंक छ । युनियन बर्लिन ४० अंक जोडेर सातौ स्थानमा रहेको छ ।

अन्य नजिता
फ्रान्कफुर्टविरुद्ध वल्फ्सवर्ग (४–३), हर्थाविरुद्ध बोरुसिया मोन्चेनग्लाडवाक (२–२) र वेर्डर ब्रेमेनविरुद्ध आरबी लाइप्जिग (१–४)