सुनील गाउँले, बारा
बागमती युवा क्लब सर्लाही विरुद्ध अतिरिक्त समयमा २–१ को कठिन जित निकाल्दै नेपाल एपिएफ क्लब एघारौं जीतपुरसिमरा गोल्डकपको सेमिफाइनलमा प्रवेश गरेको छ ।

विराट गोल्डकपको उपाधि उचालेको दुई दिनपछि सिमरा रगंशालामा खेलेको एपिएफले जितका लागि थप समयसम्म संघर्ष गर्नुपर्यो । जितसंगै एपिएफले सर्लाहीमा राजर्षी जनक गोल्डकपमा आयोजक बागमती युवा क्लबसंग व्यहोरेको हारको बदला लिएको छ ।

निर्धारित ९० मिनटको खेल १–१ को बराबरीमा सकिएपछि खेल थप समयमा धकेलिएको थियो । थप समयको १४ औं मिनटमा एपिएफका प्रदीप लामाले गरेको गोल खेलदको निर्णायक बनेको थियो । प्रदीपकै निर्णायक गोलमा एपिएफले शनिबार मात्र भारतको पञ्जाब पुलिसलाई हराउँदै विराट गोल्ड कपको उपाधि जितेको थियो ।

यसअघि निर्धारित समयको ३२ औं मिनटमा प्रदीपकै गोलबाट एपिएफले अग्रता लिएको थियो । खेलको ५२ औं मिनटमा सर्लाहीका निरज थापामगरले पेनाल्टीमा गोल गर्दै एपिएफसंग बराबरी गरे । पेनाल्टी बक्समा एपिएफका रक्षक सर्लाहीका आफैलाई निरजलाई फाउल गरेपछि सर्लाहीले पेनाल्टी पाएको थियो ।

एपिएफको जितमा दुवै गोल गरेको प्रदीप खेलको म्यान अफ दी म्याच घोषित भएका थिए । उनले ५ हजार रुपैयाँ र ट्रफि प्राप्त गरे । प्रतियोगितामा मंगलबार अन्तिम क्वाटर फाइनलमा संकटा क्लब र हेटौंडाको विजय युथ क्लबबीच प्रतिस्पर्धा हुनेछ ।