एजेन्सी – इंग्लिस प्रिमियर लिगको शीर्षस्थानमा रहेको म्यानचेस्टर सिटीले ११ अंकको अग्रता लिएको छ । लिग अन्तरगत बुधबार राति भएको खेलमा एस्टन भिल्लामाथि २–१ को पूनरागमन जित निकाल्दै सिटीले शीर्षस्थानमा म्यानचेस्टर युनाइटेडलाई ११ अंकले पछि पारेको हो ।

भिल्लामाथिको जितसँगै सिटीले उपाधि यात्रालाई थप मजवुत बनाएको छ । सिटीको ३३ खेलबाट ७७ अंक पुगेको छ । दोस्रो स्थानमा रहेको युनाइटेडको ६६ अंक छ । भिल्ला पार्क बर्मिङघममा सिटीको जितमा फिल फोडेन र रोड्रीले गोल गरे । घरेलु टोलीका लागि जोन म्याक्जिनको गोल सान्त्वना बन्यो । सबै तीन गोल पहिलो हाफमा सम्भव भएको थियो ।

खेलको पहिलो मिनेटमा नै जोन म्याक्जिनले ओले वाट्किन्सको गोलबाट घरेलु टोली एस्टन भिल्लाले अग्रता लिएको थियो । २२औं मिनेटमा फिल फोडेनले गोल गर्दै खेलाई १–१ गोलको बराबरीमा ल्याए । उनले बर्नाडो सिल्भाको पासमा गोल गरेका थिए । ४०औं मिनेटमा सिल्भाकै पासमा रोड्रीले गोल गर्दै सिटीलाई २–१ को अग्रता दिलाए ।

४४औं मिनेटमा सिटी १० खेलाडीमा समेटियो । जोन स्टोन सिधै रातो कार्ड खाँदै मैदानबाट बाहिरिएका थिए । राम्सेमाथि फल गरेपछि सुरुवातमा पहेलो कार्ड देखाएपनि त्यसपछि भिएआरको सहायतामा उनलाई रातो कार्ड देखाउँदै मैदान बाहिर पठाएको थियो । १० खेलाडीमा समेटिएको सिटीले दोस्रो हाफमा आफ्नो अग्रतालाई जोगाउन सफल हुदा एस्टन भिल्लाले त्यसको फाइदा उठाउन नसक्दा घरेलु मैदानमा पराजित हुन पुग्यो ।