भरतपुर (हाम्रो खेलकुद)– मोरङ फुटबल क्लब टुबोर्ग विकास रनिङ शिल्ड अन्तर्राष्ट्रिय आमन्त्रण नकआउट फुटबल प्रतियोगिताको सेमीफाइनलमा पुगेको छ । चितवनमा जारी प्रतियोगितामा आइतबार पोखराको सहारा क्लब पोखरालाई २–१ ले हराउँदै मोरङले अन्तिम चारमा पुगेको हो ।
नारायणगढस्थित क्याम्पाचौरमा मोरङका लागि खेलको २१ औं मिनेटमा दीपक राईले गोल गरे । सहाराका विदेशी खेलाडी सेगुनले ३६ औंमा बराबरी गोल फर्काएपछि खेल थप रोमाञ्चक बनेको थियो । ४७ औं मिनेटमा विदेशी खेलाडी मार्टिन अजईले गोल गरेपछि त्यहि नै मोरङका लागि निर्णाक बन्यो । प्रतियोगिताको दोस्रो क्वाटरफाईनल खेल चितवन–११ र मनाङ मस्र्याङ्दीबीच प्रतिस्पर्धा हुनेछ । मनाङ पहिलो खेलमा भारतको युनाइटेड क्लब सिवानलाई पछि पार्दै अन्तिम ८ मा पुगेको हो भने चितवनले पहिलो खेलमा कैलालीलाई पराजित गरेको थियो । प्रतियोगिताको विजेताले रनिङ शिल्ड, मेडल तथा नगद ३ लाख रुपैयाँ र उप–विजेताले ट्रफी मेडलसहित नगद एक लाख ५० हजार रुपैयाँ पुरस्कार पाउने छन् ।
