एजेन्सी – तनवापुर्ण बनेको फ्रेन्च लिग वानको खेलमा लियोनले एक गोलले पछि परेको अवस्थामा मोनाकोमाथि उसकै मैदानमा ३–२ को रोमाञ्चक जित दर्ता गरेको छ ।

मोनाकोमा आइतबार राति भएको खेलमा लियोनको जितमा मेम्फिस डिपाए, मार्सेलो र रायन चेर्कीले गोल गरे । घरेलु टोलीका केभिन भोलान्ड र विसाम विन यडरले गोल फर्काए । खेलको २५औं मिनेटमा विसाम विन यडरको पासमा केभिन भोलान्डले गोल गरेपछि घरेलु टोली मोनाकोले सुरुवाती अग्रता लिएको थियो ।

५७औं मिनेटमा मेम्फिस डिपाएले कार्ल टोको इकाम्वीको पासमा गोल गर्दै लियोनलाई खेलमा फर्काएका थिए । ७०औं मिनेटमा म्याक्सेन काकुरेट दोहोरो पहेँलो कार्ड खाँदै मैदानबाट बाहिरिएपछि लियोन १० खेलाडीमा समेटिएको थियो । तर, त्यसको ७ मिनेटपछि ७७औं मिनेटमा मार्सेलोले मेम्फिस डिपाएको पासमा गोल गर्दै लियोनलाई २–१ को अग्रता दिलाए ।

८६औं मिनेटमा विसाम विन यडरले पेनाल्टीमार्फत गोल गर्दै खेललाई २–२ गोलको बराबरीमा ल्याए । ८९औं मिनेटमा रायन चेर्कीले गोल गर्दै लियोनलाई ३–२ को रोमाञ्चक र प्रतिस्पर्धात्मक जित दिलाए ।

खेलको अन्त्यमा दुवै टोलीका खेलाडी एक आपसमा विवादमा उत्रिएपछि रेफ्री क्लेमेन्ट टर्पिनले दुवै टोलीका दुई–दुई खेलाडी गरी चार जनालाई रातो कार्ड देखाएको थियो । मोनाकोका पिएट्रो पेलेग्री र विलेम तथा लियोनका माटियो डि सिलियो र मार्सेलोलाई रातो कार्ड देखाएका थिए ।

जितपछि लियोन ३५ खेलबाट ७० अंक जोडेर चौथो स्थानमा रहेको छ । पराजित मोनाको ७१ अंक जोडेर तेस्रो स्थानमा रहेको छ । शीर्षस्थानको लिलको ७६ तथा दोस्रो स्थानको पीएसजीको ७५ अंक छ ।