एजेन्सी – इंग्लिस क्लब चेल्सीले यूईएफए च्याम्पियन्स लिगको फाइनलमा स्थान पक्का गरेको छ । बुधबार भएको सेमिफाइनलको दोस्रो लेगमा रियल म्याड्रिडलाई २-० ले पराजित गर्दै चेल्सी फाइनलमा प्रवेश गरेको हो । चेल्सीले समग्रमा ३-१ को जित दर्ता गर्न सफल रहयो ।

घरेलु मैदान स्टामफर्ड ब्रिजमा चेल्सीले दुवै हाफमा १-१ गोल गरेको थियो । चेल्सीका लागि फरवार्ड टिमो वेर्नर र मिडफिल्डर मेसन माउन्टले गोल गरे । खेलको २९ औं मिनेटमा जर्मन फरवार्ड वेर्नरको गोलमा चेल्सीले अग्रता लिएको थियो । काइ हाभर्ट्जको चिप प्रहार क्रसबारमा लाग्दै फर्केपछि वेर्नरले त्यसै बललाई खाली पोस्टमा हेडरमार्फत गोल गरेका थिए ।

रियल म्याड्रिडले बल पोसेसनमा पकड जमाएपनि चेल्सीले कम आक्रमणमै गोल गर्न सकेको थियो । विशेषगरी काउन्टर अट्याकमा अघि बढेको चेल्सीले गोलरक्षक कोर्टुवालाई पटक पटक व्यस्त राखेको थियो । दोस्रो हाफको अन्त्यतिर माउन्टले क्रिस्टियन पुलिसिचको पासलाई पहिलो टचमा नै गोल गर्दै चेल्सीको जित सुनिश्चित गरेका थिए ।

चेल्सीले अब मे २९ मा हुने फाइनलमा इंग्लिस प्रिमियर लिगकै म्यानचेस्टर सिटीको सामना गर्नेछ । सिटीले मंगलबार पिएसजीमाथि ४-१ को जित दर्ता गर्दै फाइनलमा स्थान पक्का गरेको थियो । चेल्सीले पछिल्लोपटक सन् २०१२ मा उपाधि जितेको थियो भने सिटी पहिलो पटक फाइनल प्रवेश गरेको हो ।