एजेन्सी – च्याम्पियन्स लिग फाइनल अघि प्रिमियर लिगको भेटमा चेल्सीले म्यानचेस्टर सिटीलाई हराएको छ । इन्जुरी समयमा मार्कोस अलन्सोले गोल गरेपछि शनिबार चेल्सीले सिटीमाथि २–१ को जित हासिल गरेको छ । जितसँगै चेल्सी अंक तालिकाको तेस्रो स्थानमा उक्लेको छ ।

शीर्षस्थानमा मजबुद रहेको सिटीले उपाधिका लागि भने अझै कुर्नुपर्ने भएको छ । ३ मिनेट इन्जुरी समयको दोस्रो मिनेटमा अलन्सोले गोल गर्दै चेल्सीलाई महत्वपूर्ण जित दिलाएका थिए । यी दुई टोलीबीच मे २९ मा च्याम्पियन्स लिग फाइनल हुँदैछ । पहिलो हाफमा सर्जियो अगुएरो पेनाल्टीमा गोल गर्नबाट चुकेपछि सिटी गोलअन्तरलाई दोब्बर बनाउनबाट चुकेको थियो । रहिम स्टर्लिङको गोलबाट सिटीले ४४ औं मिनेटमा अग्रता लिएको थियो ।

पहिलो हाफको इन्जुरीको तेस्रो मिनेटमा सिटीले पेनाल्टी पाएको थियो । त्यसमा अगुएरो असफल भए । उनको प्रहारलाई चेल्सीका गोलकिपर इडोर्ड मेन्डीले सहजै रोकेका थिए । ६३ औं मिनेटमा हकिमको गोलबाट चेल्सी खेलमा फर्केको थियो । अलन्सोले टिमो वार्नरको क्रसमा गोल गर्दै टोलीलाई जित दिलाएका थिए । अन्तिम ३ चरणका खेल बाँकी रहँदा सिटीको ८० अंक छ । चेल्सीको ६४ अंक पुगेको छ । एक खेल कम खेलेको म्यानचेस्टर युनाइटेड ६७ अंकसहित दोस्रो स्थानमा र लेस्टर सिटी ६३ अंकसहित चौथो स्थानमा छ ।