एजेन्सी – इंग्लिस फरवार्ड ह्यारी केन र डेनिस मिडफिल्डर पिएरे इमिल होएबिएरको गोल मद्दतमा टोटेनहम हटस्परले वल्भ्समाथि सहज जित दर्ता गरेको छ । घरेलु मैदानमा आइतबार राति भएको खेलमा टोटेनहमले वल्भ्सलाई २–० ले पराजित गरेको हो ।

टोटनहम हटस्पर स्टेडियममा घरेलु टोलीले पहिलो र दोस्रो हाफमा समान एक गोल गरेको थियो । बल पोसेसनमा बलियो पकड बनाएपनि टोटेनहमले गोलको लागि पहिलो हाफको अन्त्यतिर कुर्नुपरेको थियो ।

४५औं मिनेटमा केनले पिएरे इमिल होएबिएरको पासमा गोल गर्दै टोटेनहमलाई १–० को अग्रता दिलाए । पहिलो गोलको लागि असिस्ट दिएका होएबिएरले ६२औं मिनेटमा गोल गर्दै टोटेनहमलाई २–० को जित दिलाए । ग्यारेथ बेलको प्रहार गोलरक्षक रुइ प्याट्रीसियोले बचाएपनि रिबाउन्डमा उनले गोल गरेका थिए । टोटेनहमले गोलका ५ ठुला अवसर सिर्जना गर्दा वल्भ्सले एक मात्रै ठुलो अवसर सिर्जना गरेपनि गोल गर्न नसक्दा पराजित हुन पुग्यो ।

जितपछि टोटेनहम ३६ खेलबाट ५९ अंक जोडेर छैटौं स्थानमा उक्लिएको छ । पराजित वल्भ्स ४५ अंक जोडेर १२औं स्थानामा यथावत रहेको छ ।

प्रिमियर लिगकै अर्काे खेलमा घरेलु मैदानमा क्रिस्टल प्यालेसले एस्टन भिल्लालाई ३–२ ले पराजित गर्यो । क्रिस्टल प्यालेसको जितमा क्रिस्टियन बेन्टेके, विलफ्रेड जाहा र टिरिक मिटचेलले गोल गरे । एस्टन भिल्लाका जोन म्याकजिन र अनवर इल घाँजीले गोल फर्काए ।

जितपछि क्रिस्टल प्यालेस ३६ खेलबाट ४४ अंक जोडेर १३औं स्थानमा उक्लदा पराजित एस्टन भिल्ला ४९ अंक जोडेर ११औं स्थाना रहेको छ ।