एजेन्सी – स्पेनिस ला लिगा अन्तर्गत आइतबार ३७ औं चरणका सबै १० खेल एकै समयमा जारी छ । उपाधि होडमा रहेका एटलेटिको म्याड्रिड, रियल म्याड्रिड र बार्सिलोना तीनै टोलीले पहिलो हाफमा बराबरी खेलिरहेका छन् ।

रियल म्याड्रिड र एथ्लेटिक बिल्बाओको खेल गोलरहित बराबरीमा छ भने एटलेटिको म्याड्रिड र ओसासुनाको खेलमा समेत कुनै गोल भएको छैन । बार्सिलोनाले भने सेल्टा भिगोविरुद्ध पहिलो हाफमा अग्रता लिएर पनि त्यसलाई जोगाउन सकेन । यस्तै चौथो स्थानमा रहेको सेभिया भिल्लारियलविरुद्ध १-० ले पछाडी रहेको छ ।

बार्सिलोनाले खेलको २८ औं मिनेटमा कप्तान लिओनेल मेस्सीको गोलमा अग्रता लिएको थियो । सर्जियो बुस्केट्सको लामो क्रसमा मेस्सीले हेडरमार्फत गोल गर्दै घरेलु टोलीलाई अग्रता दिलाएका थिए । तर पछि परेको १० मिनेट नबित्दै सेल्टा भिगोले गोल फर्कायो । सान्ती मिनाले पेनाल्टी क्षेत्र बाहिरबाट गरेको प्रहारलाई गोलरक्षक मार्क आन्दर टेर स्टेगनले ठम्याउन नसक्दा सहज गोल भएको थियो ।

एटलेटिकोले ओसासुनाविरुद्ध लगातार आक्रमण बुनेपनि गोल गर्न सकेको छैन । लुइस सुआरेजले दुई पटक गोल गर्ने अवसर चुकाएका छन् । उनको एक प्रहार पोस्टमा समेत लागेको थियो । रियल र बिल्बाओबीच भने प्रतिस्पर्धा दुवैतर्फ उस्तै रहेको छ । रियलले बल पोसेसनमा पकड जमाएपनि डरलाग्दो आक्रमण गर्न सकेको छैन ।

आजको खेलमा एटलेटिकोले जित हासिल गरेर रियल जितबाट बन्चित भएमा एटलेटिकोले उपाधि जित्नेछ । त्यस्तै रियललाई पनि अंक तालिकाको शीर्ष स्थानमा उक्लने समिकरणको सम्भावना छ । त्यसका लागि एटलेटिकोले जित हासिल गर्नुहुन्न । बार्सिलोनाका लागि भने उपाधि सम्भावना जीवित राख्न आफ्नो जित र एटलेटिकोको हारको नतिजा आवश्यक छ ।