एजेन्सी – क्याटलान क्लब बार्सिलोनामा अर्जेन्टिनी फरवार्ड तथा कप्तान लियोनेल मेस्सीको भविष्य के हुने अझै भन्न सकिने अवस्था बनिसकेको छैन । उनी क्लबमै रहने वा क्लब छाड्ने उनी आफैले निर्णय गर्नेछ ।

बार्सिलोनामा मेस्सीको भविष्य अनिश्चित बनिरहँदा इंग्लिस क्लब आर्सनलले प्रतिभाशाली लिओ मेस्सोलाई अनुबन्ध गरेको छ । १० वर्षीय मेस्सोलाई आर्सनलले बिहीबार अwनुबन्ध गरेको जनाएको छ । उनी यो सिजन २०२१–२२ को सिजनसँगै आर्सनलको एकेडेमीमा जोडिनेछ ।

केन्यामा जन्मिएका प्रतिभाशाली युवा खेलाडी मेस्सो वेस्ट ह्याम युनाइटेडको एकेडेमीबाट आएका हुन् । उनले भविष्यमा केन्या अथवा इंग्ल्यान्डबाट खेल्न सक्नेछन् । उनले आर्सनलमा ९ नम्वरको जर्सी लगाएको तस्वीर सार्वजनिक भएको छ । यस्ता युवा खेलाडीको अनुबन्धले पनि विशेष अर्थ राख्दछ ।

मेस्सोमा पनि मेस्सीमा जस्तै शारीरिक बनावट सोचेजस्तै गरी विकास हुन सकेको छैन । मेस्सोको किशोरावस्थाका कठिनाई र उसको शरीरको शारीरिक विकास र एकेडेमीमा प्रशिक्षणको जिम्मा आर्सनलले लिने छ ।

अर्जेन्टिनामा जन्मिएपनि मेस्सी १३ वर्षको उमेरमा बार्सिलोनाको एकेडेमी ला मासियामा आवद्ध हुन पुगेका थिए । शारीरिक विकासमा समस्या रहेको मेस्सीको सम्पुर्ण खर्च बार्सिलोनाले नै लिएको थियो । ३३ वर्षीय मेस्सी अहिले विश्व फुटबलको एक हस्तीको रुपमा परिचित छन् । उनी अहिले पनि बार्सिलोनाकै लागि खेलिरहेका छन् ।