एजेन्सी – इंग्लिस प्रिमियर लिगको च्याम्पियन म्यानचेस्टर सिटीका फरवार्ड सर्जियो अगुएरोले लिगको अन्तिम खेलमा यादगार बिदाइ पाएका छन् ।

लिगको अन्तिम खेलमा सिटीले घरेल मैदानमा एभर्टनलाई ५-० ले पराजित गर्दा अगुएरोले दुई गोल गरे । वैकल्पिक खेलाडीका रुपमा दोस्रो हाफमा मैदान प्रवेश गरेका उनले कीर्तिमान रच्दै प्रिमियर लिगबाट बिदा भए । पहिलो हाफमा केभिन डे ब्रुएन र ग्याब्रिएल जेससको गोलमा सिटीले अग्रता लिएको थियो । दोस्रो हाफमा फिल फोडेनसँगै अगुएरोको दुई गोलमा सिटीले सहज जित दर्ता गर्यो ।

खेल सुरु हुनुअघि सम्मानस्वरूप सिटीका खेलाडीले उनलाई गार्ड अफ अनर दिएका थिए । ६५ औं मिनेटमा रियाद माहरेजको स्थानमा मैदान प्रवेश गरेका उनले चार मिनेटपछि नै गोल गरे । फर्नान्डीन्होले पेनाल्टी क्षेत्र बाहिर खोसेको बललाई अगुएरोले आउटसाइड फुटबाट प्रहार गर्दै गोल गरेका थिए । त्यसको ५ मिनेटपछि अगुएरोले फर्नान्डीन्होकै पासमा दोस्रो गोल गर्न सफल रहे ।

अगुएरोले अन्तिम खेलमा दुई गोल गर्दै वायन रोनीले राखेको प्रिमियर लिग कीर्तिमान समेत तोडेका छन् । रोनीले म्यानचेस्टर युनाइटेडका लागि १ सय ८३ गोल गरेका थिए । अगुएरोले समग्रमा १ सय ८४ गोल गर्दै प्रिमियर लिगमा एकै क्लबका लागि सर्वाधिक गोल गर्ने कीर्तिमान आफ्नो नाममा लेखाए ।

अगुएरोले सिटीको जर्सीमा खेल्दै ५ पटक प्रिमियर लिग उपाधि जिते । सन् २०११/१२ सिजनको अन्तिम खेलको अन्तिम मिनेटमा गोल गर्दै अगुएरोले इतिहासमा आफ्नो नाम लेखाएका थिए । उनले क्विन्स पार्क रेन्जर्सविरुद्ध उक्त गोल गर्दै सिटीलाई पहिलो प्रिमियर लिग उपाधि दिलाएका थिए । उक्त गोलका कारण नै म्यानचेस्टर युनाइटेड उपाधिबाट विमुख भएको थियो ।

त्यसयता अगुएरोले सिटीको जर्सीमा थुप्रै उपाधि जितेका छन् । घरेलु फुटबलमा एक पछि अर्को उपाधि जितेका उनले च्याम्पियन्स लिगमा भने सोहि सफलता पाएनन् । अगुएरोसँग अब उक्त लक्ष्य पूरा गर्ने अवसर छ । सिटीले अर्को साता च्याम्पियन्स लिग फाइनलमा चेल्सीसँग खेल्दैछ ।

अगुएरोले च्याम्पियन्स लिग सकिएपछि आफ्नो भविष्य निर्धारण गर्ने बताएका छन् । यद्यपि बार्सिलोनासँग उनको सम्झौता भइसकेको पनि जनाइएको छ । उनले फ्रि ट्रान्सफरमा क्याटलान क्लब जाने निर्णय गरेपनि फाइनलपछि मात्र घोषणा गर्ने भएका हुन् ।

यो पनि : चेल्सी र लिभरपुल च्याम्पियन्स लिगमा, लेस्टर पाँचौ