एजेन्सी – पेरिस सेन्ट जर्मेन (पिएसजी) का फरवार्ड किलियन एमबाप्पेले फ्रान्सेली लिगको सर्वाधिक गोलकर्ता सँगै लिगको सर्वोत्कृष्ट खेलाडीको उपाधि पनि जितेका छन् ।

लिगमा ३१ खेल खेल्दै उनले २७ गोल गर्न सफल रहे । पिएसजी लिगको उपविजेतामा सिमित भएपनि व्यक्तिगत रुपमा भने एमबाप्पेका लागि सिजन सफल नै रहयो । सिजनको अन्त्यसंगै उनको भविष्यमा पनि प्रश्न उठ्न थालेको छ । तर एमबाप्पेले त्यसमा खुलेर बोल्न चाहेनन् ।

‘म मात्र जित्न चाहन्छु । म अहिले जहाँ छु, त्यहाँ धेरै कुरा हासिल गर्न सक्छु । यहाँको योजना निकै राम्रो छ,’ उनले भने,’ करिअरमा सबैभन्दा महत्त्वपूर्ण त्यहि नै हो । योजना राम्रो भएन भने भविष्य निर्धारण गर्न सकिन्न ।’

‘पिएसजी र मेरो प्रतिनिधिबीच सम्झौता नवीकरण गर्ने छलफल चलिरहेको छ । हेरौं अब के हुन्छ । म यहाँ सधैं खुसी छु र पछिल्लो चार वर्ष निकै फलदायी भएको छ,’ उनले भने ।

‘क्लबसँग मेरो सम्बन्ध राम्रो छ । अध्यक्षदेखि समर्थकसम्म सबै सकारात्मक छ । क्लबलाई पनि यो थाहा छ । म क्लब, यो सहर र आफ्नो देशसँग नजिक छु,’ एमबाप्पेले थपे ।

पिएसजीका अध्यक्ष नासेर अल खलिफाले पनि एमबाप्पेको भविष्यलाई लिएर शंका गर्ने ठाउँ नरहेको प्रष्ट पारे । उनले क्लब र उनको सम्बन्ध राम्रो रहेकाले उनी पेरिसमा रहनेमा विश्वस्त रहेको बताए ।