काठमाडौं (हाम्रो खेलकुद) – अन्तर्राष्ट्रिय मैत्रीपूर्ण खेलमा सहभागिता जनाउनका लागि बुधबार इराक पुगेको नेपाली राष्ट्रिय फुटबल टोलीले बिहीबार प्रशिक्षण गरेको छ ।

मंगलबार राती नेपालबाट प्रस्थान गरेको टोली कतार हुँदै बुधबार विहान इराक पुगेको थियो । पहिलो दिन होटेलमा सामान्य रिकभरी गरेको टोली बिहिबार भने पूर्ण प्रशिक्षणमा सहभागी भयो । नेपालले जेठ १५ गते शनिबार इराकसँग मैत्रीपूर्ण खेल खेल्दैछ । खेल नेपाली समयअनुसार रातको १०:१५ बजे हुनेछ ।

इराकविरुद्ध खेलपछि टोली स्थल मार्ग हुँदै आइतबार कुवेततर्फ प्रस्थान गर्नेछ । इराकविरुद्ध खेलका लागि प्रस्थान गर्नुअघि प्रशिक्षक अब्दुल्लाह अलमुताइरीले टोलीको तयारी राम्रो रहेको बताएका थिए । उनले नतिजा आउन केहि समय लाग्ने भएपनि भविष्यका लागि अहिलेबाट नै सोच्नुपर्ने बताएका थिए ।

थ्री नेसन्स कप उपाधि जित्न सफल टोलीबाट १३ खेलाडी परिवर्तन गर्दै प्रशिक्षक अलमुताइरीले टोली घोषणा गरेका थिए । थ्री नेसन्स कप जित्दाका १० खेलाडीले मात्र राष्ट्रिय टोलीमा स्थान बनाउन सके । फरवार्ड नवयुग श्रेष्ठ र मिडफिल्डर सन्तोष तामाङले राष्ट्रिय टोलीमा पुनरागमन गर्दा ६ खेलाडी पहिलो पटक राष्ट्रिय टोलीमा पर्न सफल भएका छन् ।

मिडफिल्डर कमल थापा, सुरज जिउ ठकुरी, गौतम श्रेष्ठ, आयुष घलान, मनिष डाँगी र गोलरक्षक विशाल सुनार पहिलो पटक राष्ट्रिय टोलीमा परेका हुन् । फरवार्ड आशिष लामा र सुमन लामासँगै मिडफिल्डर पुजन उपरकोटी पनि टोलीमा फर्किएका छन् ।

कुवेतमा नेपालले विश्व कप तथा एसिया कप छनोटका बाँकी रहेको ३ खेल खेल्नेछ । नेपाली टोलीले जेठ २० गते चाइनिज ताइपेइ, जेठ २५ गते गते जोर्डन र जेठ २८ गते अष्ट्रेलियासँग प्रतिस्पर्धा गर्नेछ । नेपाल अहिले अंक तालिकामा ३ अंकका साथ चौथो स्थानमा छ । नेपालको ५ खेलमा १ जित र ४ खेलमा हार बेहोरेको थियो। अंक तालिको पुछारमा रहेको ताइपेइले अंक जोड्न सकेको छैन ।

अष्ट्रेलिया १२ अंकका साथ शीर्षस्थानमा छ भने कुवेत र जोर्डनको समान १० अंक छ । अंक तालिकाको चौथो स्थानमा रहँदै छनोट चरण सकेको खण्डमा नेपालले एसियन कप छनोटको तेस्रो राउन्डमा सोझै स्थान बनाउने अवसर रहनेछ । विश्वकपमा छनोट हुने नेपालको सम्भावना भने गणितीय रुपमा मात्र बाँकी छ ।

राष्ट्रिय टोलीको २३ सदस्यीय अन्तिम टोली :

गोलरक्षक : किरण चेम्जोङ, दीप कार्की, विशाल सुनार

डिफेन्डर : अनन्त तामाङ, दीनेश राजवंशी, गौतम श्रेष्ठ, रोहित चन्द, सुमन अर्याल, विकास खवास

मिडफिल्डर : एरिक विष्ट, विशाल राई, मनिष डाँगी, कमल थापा, सन्तोष तामाङ, सुनिल बल, सुरज जिउ ठकुरी, पुजन उपरकोटी, आयुष घलान

फरवार्ड : अभिषेक रिजाल, अन्जन विष्ट, नवयुग श्रेष्ठ, आशिष लामा, सुमन लामा

प्रशिक्षणका तस्बिरहरु : सौजन्य एनएसजेएफ