एजेन्सी – रियल म्याड्रिडको सर्वाधिक सफल प्रशिक्षकका रुपमा जिनेदिन जिदानले दोस्रो कार्यकाललाई अन्त्य गर्दै क्लब छाडेका छन् । मेगुइल मुनोजले जिदानको भन्दा बढी उपाधि जितेपनि दुई पटकको कार्यकालमा जिदानले कम खेलमा ११ उपाधि दिलाएका थिए । मुनोजले १४ उपाधि जिताएका थिए ।

मुनोजले भन्दा ३ सय ४३ खेल कम खेलाएका जिदानले ११ उपाधि टोलीलाई दिलाएका हुन् । मुनोजले ६ सय ५ खेलमा रियलको प्रशिक्षणमा सम्हालेका थिए । रियलका पूर्व खेलाडी जिदानले भने २ सय ६३ खेलमा रियलको जिम्मेवारी सम्हाले। जिदानले औसतमा हरेक २३ खेलमा एक उपाधि जिताएका थिए । त्यो क्लब इतिहासकै सबैभन्दा सफल नतिजा हो ।

फ्रान्सेली टोलीका पूर्व कप्तान समेत रहेका जिदानको प्रशिक्षणमा रियलले १ सय ७४ खेलमा जित, ५३ खेलमा बराबरी र ३६ खेलमा हार बेहोरेको थियो । उनको कार्यकालमा टोलीले ६६ प्रतिशत जित निकालेको थियो । यो सिजन रियलले १८ खेलसम्म अपराजित यात्रा तय गरेको थियो ।

तीन पटक युरोपियन च्याम्पियन

रियल युरोपियन फुटबलमा लगातार तीन पटक च्याम्पियन्स लिग जित्ने प्रशिक्षकका रुपमा सधै चर्चामा रहनेछन् । उनले पहिलो कार्यकालमा त्यो सफलता हासिल गरेका थिए । उनले आफ्नो कार्यकालमा २ पटक ला लिगा उपाधि दिलाएका थिए । लिग नजितेको सिजन पनि उनले अन्तिम दिनसम्म रियलको सम्भावना कायम राखेका थिए ।