एजेन्सी – थोमस टुचेलले एक वर्षभन्दा कम समयमा दोस्रो प्रयासमा च्याम्पियन्स लिग उपाधि जितेका छन् । शनिबार म्यानचेष्टर सिटीलाई १–० ले हराउँदै टुचेलको चेल्सीले उपाधि जितेको हो ।

गत सिजन उनको प्रशिक्षणमा पेरिस सेन्ट जर्मेन (पिएसजी) क्लब इतिहासमा पहिलो पटक च्याम्पियन्स लिगको फाइनलमा पुगेको थियो । त्यति बेला पिएसजी जर्मन क्लब बार्यन म्युनिखसँग पराजित भएको थियो । उपाधि जितेपछि जर्मन प्रशिक्षक टुचेलले यो सिजनको फाइनल फरक भएको स्वीकार गरे ।

‘दोस्रो पटकको प्रयासमा जित्न सफल हुनु साह्रै सुखद हो । तर यो अझै फरक छ,’ उनले भने, ‘हरेक दिन जसो हामी उपाधिको नजिक पुगेका थियौं । खेलाडीहरु जितका लागि प्रतिबद्ध थिए । हामी सिटीको जुत्तामा ढुंगा बन्न चाहन्थ्यौं ।’

आफ्नो टोली बहादुरीपूर्वक प्रतिस्पर्धा गर्न चाहेको र दोस्रो हाफमा भने कडा प्रतिस्पर्धा भएको टुचेलले बताए । उनले थपे, ‘यो साच्चै अविश्वसनिय थियो । सबैसँग यो खुसी साट्न पाउनु आनन्द महससु हुन्छ, साच्चै तीव्र प्रतिस्पर्धा थियो । कस्तो महसुस गरिरहेको छु भन्ने शब्द छैन ।’

सिटीविरुद्ध निर्णायक गोल गर्ने काइ हाभर्ट्जका प्रति गर्व महसुस भएको उल्लेख गर्दै टुचेलले भने, ‘उनी बलिया छन् । उनले फेरी एकपटक उच्च प्रदर्शन गरे । म एकदम खुसी छु ।’

यो पनि :

‘हार्दा निराश छौं’ – ग्वार्डिओला