एजेन्सी – स्पेनिस मिडफिल्डर तथा राइट ब्याक लुकास भाज्केज रियल म्याड्रिडमै रहने भएको छन् । सम्झौता अवधि सकिनै लाग्दा रियल र भाज्केजबीच ३ वर्षको सम्झौता नविकरण भएको छ ।

यससँगै उनी २०२४ सम्म रियलमै रहने भएको छ । भाज्केजको सम्झौता यही जुनको अन्त्यसँगै सकिने थियो । तर रियल र भाज्केजबीच सम्झौता नविकरण भएको हो । यो सिजन रियलमा सम्झौता नविकरण हुने उनी दोस्रो खेलाडी हुन् । यसअघि लुका मोड्रिचको रियलमा सम्झौता नविकरण भएको थियो ।

रियल म्याड्रिडकै उत्पादन २९ वर्षीय भाज्केजले चोट बोक्नुअघि रियलमा राइट ब्याक र राइट विंगको रुपमा रियलमा उत्कृष्ट सिजन बिताएका थिए । उनले चोट बोकेपछि ला लिगाको अन्तिम खेलहरु गुमाएका थिए । बार्सिलोनाविरुद्धको एल क्लासिकोका दौरान उनलाई चोट लागेको थियो ।

रियलको एकेडेमीका उत्पादन रहेका भाज्क्वेजले पहिला देखि नै क्लबमा रहन चाहेको बताएका थिए । उनी २०१५ देखि रियलको सिनियर टोलीमा रहेका छन् । उनले २०१४–१५ मा एक सिजन लोनमा इस्पान्योलमा बिताएका थिए । उनले रियलको लागि २४० खेल खेल्दै २६ गोल गरेका छन् ।

उनले रियलबाट दुई पटक ला लिगा, तीन पटक च्याम्पियन्स लिग, तीन पटक फिफा क्लब विश्वकप र समान दुई पटक सुपर कोपा र युइएफए सुपर कप जितेका छन् । अब उनले नयाँ प्रशिक्षक कार्लाे एन्सेलोटीको प्रशिक्षणमा खेल्नेछन् । रियलले मंगलबार साँझ मात्रै एन्सेलोटीलाई दोस्रोपटक रियलको मुख्य प्रशिक्षकमा नियुक्त गरेको छ ।