एजेन्सी – युवा फरवार्ड जियाकोमो रास्पाडोरीलाई समेट्दै आसन्न युरोकप २०२० का लागि इटालीको अन्तिम टोली घोषणा भएको छ । युरोकपमा लागि जुन १ सम्म सहभागी टोलीले २६ सदस्यीय अन्तिम टोली घोषणा गरिसक्नुपर्ने प्रावधान अनुसार मुख्य प्रशिक्षक रोवर्टो मान्सिनीले मंगलबार राति टोली घोषणा गरेका हुन् ।

जसमा उनले ससुलोका २१ वर्षीय जियाकोमो रास्पाडोरीलाई आश्चर्यजनक रुपमा समावेश गरेका छन् । प्रशिक्षक मान्सिनीले यसअघि प्रारम्भिक चरणमा छानिएका ३३ जनाबाट मान्सिलीले २८ जना छानेका थिए । त्यसमा रास्पाडोरी समावेश थिएनन् । तर अन्तिम टोली घोषणा गर्दा यी अनक्याप्ड युवा फरवार्ड टिममा अटाए भने जियानलुका मान्सिनी, माटियो पेसिना, माटियो पोलिटानो अन्तिम टोलीमा पर्न सकेनन् ।

२१ वर्षीय जियाकोमोले इटालीको उमेर समूह यु–१७, यु–१९, यु–२० र यु–२१ बाट इटालीको प्रतिनिधित्व गरिसकेका छन् । उनले यु–२१ बाट ७ खेलमा ३ गोल गरेका छन् । यो सिजन ससुलोबाट २८ खेलमा उनले ६ गोल गरिसकेका छन् ।

समूह ए मा रहेको इटालीले उद्घाटन खेलमा रोममा टर्कीसँग प्रतिस्पर्धा गर्नेछ । त्यसअघि इटलीले जुन ४ मा चेक रिपब्लिकसँग अन्तिम मैत्रीपूर्ण खेल खेल्नेछ । मे २८ मा भएको मैत्रीपूर्ण खेलमा इटलीले सानमारिनोलाई ७–० ले पराजित गरेको थियो । युरोकपको १६औं संस्करण जुन ११ देखि जुलाई ११ सम्म युरोपको विभिन्न ११ देशमा आयोजना हुँदैछ ।

इटालीको २६ सदस्यीय टोली

गोलकिपर – जियानलुजी डोनारुम्मा, एलेक्स मेरेट, साल्भाटोर सिरिगु

डिफेन्डर – फ्रान्सेस्को असेर्ब, अलेसान्द्रो बास्टोनी, लियोनार्दो बोनुची, जर्जिओ किलिएनी, जियोभानी डि लोरेन्जो, इमर्सन, एलेसान्द्रो फ्लोरेन्जी, लियोनार्दो स्पिनाजोला, राफाएल टोलोई

मिडफिल्डर – निकोलो बरेला, ब्राएन क्रिस्टान्टे, जर्जिन्हो, मानुएल लोकाटेली, लोरेन्जो पेलेग्रिनी, स्टेफानो सेन्सी, मार्को भेराट्टी

फरवार्ड – आन्द्रे बेलोट्टी, डोमेनिको बेरार्डी, फेडेरिको बर्नार्डेसी, फेडेरिको चिइसा, सिरो इमोविल, लोरेन्जो इन्सिग्ने, जियाकोमो रास्पाडोरी