एजेन्सी – प्रिमियर लिग च्याम्पियन म्यानचेस्टर सिटीका पोर्चुगिज डिफेन्डर रुवेन डियास प्लेयर अफ दि सिजन चुनिएका छन् । प्रिमियर लिगको प्लेयर अफ दि सिजन अवार्ड जित्ने क्रममा डियासले आफ्नै सहकर्मी केभिन डि ब्रुयन र टोटेनहमका ह्यारी केनलाई पछि पारे ।

म्यानचेस्टर सिटीका मिडफिल्डर ब्रुनो फर्नान्डेस, एस्टन भिल्लाका ज्याक ग्रेयासिल, वेस्ट ह्यामका थोमस सौसेक, चेल्सीका मासन माउन्ट र लिभरपुलका फरवार्ड मोहम्मद सलाह पनि सुचीमा रहेका थिए । प्लेयर अफ दि सिजन जित्ने डियास चौथो डिफेन्डर हुन् । यसअघि म्यानचेस्टर युनाइटेडका नेमान्जा भिडिक, सिटीकै पुर्व कप्तान भिन्सेन्ट कोम्पनी र लिभरपुलका भर्जिल भान डाइकले यो अवार्ड हात पारेका थिए ।

यस्तै उनी प्लेयर अफ दि सिजन जित्ने दोस्रो पोर्चुगिज खेलाडी बने । यसअघि क्रिस्टियानो रोनाल्डोले २००६–०७ र २००७–०८ को सिजनमा यो उपाधि जितेका थिए । उनले गत महिना फुटबल राइटर्स एसोसिएसनबाट पनि प्लेयर अफ द सिजन अवार्ड हात पारेका थिए ।

यसै सिजन पोर्चुगिज क्लब बेन्फिकाबाट ६५ मिलियन पाउन्डमा सिटी आएका २४ वर्षीय डियासले उत्कृष्ट सिजन व्यतित गरेका थिए । उनकै उत्कृष्ट डिफेन्सको कारण सिटीले १२ अंकको अग्रता लिँदै प्रिमियर लिग च्याम्पियन बन्न सफल भएको थियो । सिटीले १५ खेलमा क्लिन सिट राख्दा उनले ३२ खेल खेलेका थिए । डियास र इंग्लिस डिफेन्डर जोन स्टोन्सको साझेदारीमा मात्रै ३२ गोल खाएको थियो ।

सिटीले कारवाओ कप जित्दा उनी टोलीका सदस्य रहेका थिए । तर, च्याम्पियन्स लिगमा उनको टोली निराश बन्न पुगेको थियो । यो अवार्ड समर्थकको मत, प्रिमियर लिगका २० क्लबका कप्तान र फुटबल एक्सपर्ट प्यानलबाट विजेता छान्ने गरिन्छ ।