एजेन्सी – फिफा विश्वकप २०२२ तथा एएफसी एसियन कप २०२३ को छनोट अन्तर्गत सोमबार भएको खेलमा मंगोलियाले किर्गिस्तानलाई स्तब्ध पारेको छ । घरेलु मैदानमा मंगोलियाले कोरोना संक्रमणले निकै प्रभाव परेको किर्गिस्तानलाई १-० ले हराएको हो ।

फिफा वरियतामा मंगोलिया १ सय ९२ औं स्थानमा तथा किर्गिस्तान ९९ औं स्थानमा रहेको छ । किर्गीस्तान एसिया तर्फ भने १७ औं स्थानमा छ । कोरोना संक्रमणका कारण टोलीका अधिकांश खेलाडी र प्रशिक्षण टोलीको साथ गुमाएको किर्गिस्तानले डिफेन्डरलाई गोलरक्षकको भूमिकामा खेलाएको थियो । टोलीका सबै गोलरक्षक आइसोलेसनमा रहेपछि डिफेन्डर ऐजार अक्मातोभले गोलरक्षकका रुपमा खेलेका थिए ।

मंगोलियाले खेलको ३४ औं मिनेटमा ओयुन्बतार मिजिदोर्जको गोलमा अग्रता लिएको थियो । कप्तान आयुष खुरेलबतारको फ्रिकिकमा ओयुन्बतारको हेडर डीफ्लेक्ट हुँदै गोलरक्षक अक्तामोभलाई बिट गर्न सफल भएको थियो । त्यसको केहीबेरमा नै किर्गिस्तानका गुल्झिगित अल्य्कुलोभको प्रहार फितलो हुँदा खेलमा मंगोलियाको अग्रता कायम नै रहयो ।

यसै समूहको अर्को खेलमा जापानले ताजिकिस्तानलाई ४-१ ले पराजित गर्दै शत प्रतिशत नतिजालाई कायम राख्यो । जापानको ७ खेलमा २१ अंक छ भने ताजिकिस्तान १० अंक सहित दोस्रो स्थानमा छ । किर्गिस्तान ७ अंकसहित तेस्रो स्थानमा रहँदा म्यानमार र मंगोलियाको समान ६-६ अंक छ ।