एजेन्सी – युरोपेली च्याम्पियनसिप २०२० अन्तर्गत ग्रुप अफ डेथ मानिएको समूह एफको अन्तिम खेलमा साविक विजेता पोर्चुगलले फ्रान्सको सामना गर्दैछ । अघिल्लो संस्करणको फाइनलमा भिडेका यी दुई टोली यसपटक एकै समूहमा परेका हुन् ।

सन् २०१६ को युरो फाइनलमा पोर्चुगलले अतिरिक्त समयमा फ्रान्सलाई पराजित गरेको छ । उक्त खेलमा एडरले गरेको गोलसँगै पोर्चुगलले अन्तर्राष्ट्रिय फुटबलमा पहिलो उपाधि जितेको थियो । फ्रान्सले भने फाइनलमा पराजित भएपछि घरेलु मैदानमा दोस्रो र समग्रमा तेस्रो पटक युरो जित्ने अवसर गुमाएको थियो ।

त्यसपछि फ्रान्स र पोर्चुगलले सन् २०२० को यूईएफए नेसन्स लिगमा खेलेका थिए । फ्रान्सले यहाँ भने पोर्चुगलविरुद्ध २ खेलमा ४ अंक जोड्दै अन्तिम चरणमा स्थान बनाएको थियो । साविक विजेता पोर्चुगल भने समूह चरणमा नै सिमित भएको थियो ।

युरो २०१६ को फाइनलअघि फ्रान्सले पोर्चुगलमाथि लगातार १० खेलमा जित हासिल गरेको थियो । उक्त खेलमा कप्तान रोनाल्डोलाई २५ औं मिनेटमा नै चोटका कारण गुमाएपछि पोर्चुगल कमजोर हुने आँकिएको थियो । तर १ सय ९ औं मिनेटमा एडरले गोल गर्दै उपाधि दिलाए । त्यो गोल नै हालसम्म पोर्चुगलका लागि एडरको एकमात्र गोल हो ।

फ्रान्स र पोर्चुगलले हालसम्म २७ खेल खेलेका छन् । जसमा १९ खेलमा फ्रान्स विजयी भएको छ भने पोर्चुगलले ६ खेल जितेको छ । २ खेल बराबरीमा सकिएका छन् । पछिल्लो पटक यी दुई टोलीले नेसन्स लिग अन्तर्गत ११ अक्टोबर २०२० मा खेलेका थिए । घरेलु मैदानमा एनगोलो कान्टेले गरेको गोलमा फ्रान्स १-० ले विजयी रहेको थियो ।

पोर्चुगलका कप्तान रोनाल्डोले युरोमा सर्वाधिक २३ खेल खेलेका छन् । यसक्रममा १२ गोल गर्दै उनले सर्वाधिक गोलकर्ताको कीर्तिमान पनि आफ्नै नाम गरेका छन् । जारी प्रतियोगितामा उनले हंगेरीविरुद्ध २ र जर्मनीविरुद्ध १ गोल गरिसकेका छन् । उनको नजर अन्तर्राष्ट्रिय फुटबलको सर्वाधिक गोलकर्ताको कीर्तिमानमा छ । उनी १ सय ९ गोल गरेका इरानका अली दाइभन्दा २ गोलले मात्र पछाडी छन् ।

युरो २०१६ को फाइनलमा रहेका ११ खेलाडी अहिले पनि पोर्चुगलको टोलीमा छन् । फ्रान्समा भने त्यसबेलाका ५ खेलाडी मात्र छन् । सन् २०१८ को विश्वकप जित्दाका १४ खेलाडी भने टोलीमा छन् ।

यो पनि : महारथी मोड्रीच