एजेन्सी – युरोपेली च्याम्पियनसिप २०२० अन्तर्गत समूह ई को अन्तिम खेलमा स्लोभाकियाविरुद्ध फराकिलो जित निकाल्दै स्पेन अन्तिम १६ मा प्रवेश गरेको छ । स्लोभाकियालाई ५-० ले पराजित गरेको स्पेनका लागि अर्को खेलमा स्वीडेनले जितेपछि समूहको दोस्रो स्थानमा रहँदै अघि बढेको हो । स्पेनले अब क्रोएसियाको सामना गर्नेछ ।

यस जितसँगै स्पेनले ३ खेलमा ५ अंक जोड्दै अन्तिम १६ को यात्रा तय गरेको छ । अर्को खेलमा स्वीडेनले पोल्यान्डलाई ३-२ ले पराजित गरेपछि स्पेन समूह उपविजेता बन्दै नकआउट चरणमा पुगेको हो । स्वीडेन भने ३ खेलमा ७ अंकका साथ समूह विजेता बन्यो । यस समूहमा स्लोभाकिया ३ खेलमा ३ अंक जोड्दै तेस्रो स्थानमा छ । पोल्यान्ड भने १ अंकसहित पुछारमा रहेर प्रतियोगिताबाट बाहिरियो ।

स्पेनले स्लोभाकियाविरुद्ध गोलरक्षक मार्टिन डुब्राभ्काको आत्मघाती गोलमा सुरुवाती अग्रता बनाउँदै २-० को अग्रता बनाएको छ । खेलको १२ औं मिनेटमा अल्भारो मोराटाले पेनाल्टीमा गोल गर्न नसक्दा खेल गोलरहित नै रहेको थियो । मोराटाले गरेको पेनाल्टी प्रहारलाई गोलरक्षक डुब्राभ्काले विफल पारेका थिए ।

पेनाल्टी विफल पार्दै नायक बनेका डुब्राभ्का ३० औं मिनेटमा भने खलनायक बने । डिफेन्सले मिसपास गरेको बलमा पाब्लो सराबियाले गरेको प्रहार क्रसबारमा लागेर फर्कियो । उक्त रिबाउन्डलाई बाहिर पठाउने प्रयासमा डुब्राभ्काले सिधै पोस्टभित्र बल प्रहार गरेका थिए ।

पहिलो हाफको इन्ज्युरी समयमा स्पेनले अग्रता दोब्बर पार्यो । डिफेन्डर एमेरिक लापोर्टले गोल गर्दै स्पेनलाई २-० ले अघि बढाएका थिए । स्लोभाकियाको डिफेन्सले कर्नरमा राम्रो क्लिअरेन्स गर्न नसक्दा जेरार्ड मोरेनोले दिएको क्रसलाई लापोर्टले हेडरमार्फत गोल गरेका थिए ।

दोस्रो हाफमा थप आक्रामक देखिएको स्पेनले ५६ औं मिनेटमा नै ३-० को अग्रता लियो । पाब्लो सराबियाले पेनाल्टी क्षेत्र भित्रबाट सुन्दर फिनिसिङमा गोल गर्दै स्पेनलाई सहज जिततर्फ उन्मुख गरे । उनले जोर्डी अल्बाले बायाँ विंगबाट दिएको लो क्रसलाई फार पोस्टमा गोल गरेका थिए ।

६७ औं मिनेटमा वैकल्पिक खेलाडीका रुपमा मैदान प्रवेश गरेका फेरान टोरेसले स्पेनको अग्रता फराकिलो पारे । कर्नरबाट बनेको मुभमा टोरेसले गोल गरेका थिए । कोके, सराबिया र पेड्रीले बनाएको आकर्षक मुभलाई म्यानचेस्टर सिटीका फरवार्डले गोलमा परिणत गरेका थिए । उनले सराबियाको अन्तिम क्रसलाई ब्याकहिल फ्लिकमार्फत सहजै गोल गरेका थिए ।

७१ औं मिनेटमा जुराज कुच्काले आत्मघाती गोल गरेपछि स्पेन ५-० ले अघि बढ्यो । पाउ टोरेसको प्रहारलाई गोलरक्षक डुब्राभ्काले बचाउने प्रयास गरेपनि त्यसपछि आएको बललाई कुच्काले क्लियर गर्न खोज्दा आफ्नै पोस्टमा छिरेको थियो ।

यो पनि : पोल्यान्डलाई हराउँदै स्वीडेन समूह विजेता