एजेन्सी – युरोपेली च्याम्पियनसिप २०२० अन्तर्गत समूह ई को अन्तिम खेलमा पोल्यान्डलाई पराजित गर्दै स्वीडेन समूह विजेताको रुपमा अन्तिम १६ मा प्रवेश गरेको छ । इन्ज्युरी समयमा भिक्टर क्लेसनले गोल गरेपछि स्वीडेनले ३-२ को जित दर्ता गरेको हो ।

स्वीडेनका लागि एमिल फोर्सबर्गले दुवै हाफमा गोल गर्दै २-० को अग्रता दिलाएका थिए । दोस्रो हाफमा लेवान्डोस्कीले २ गोल गरेपछि एक समय खेल २-२ को बराबरीमा आएको थियो । तर क्लेसनले इन्ज्युरी समयको चौथो मिनेटमा विजयी गोल गर्दै स्वीडेनलाई समूह विजेता बनाए ।

यस जितसँगै स्वीडेन ३ खेलमा ७ अंकका साथ समूह विजेता बन्यो । स्पेनले ३ खेलमा ५ अंक जोड्दै उपविजेताको रुपमा अन्तिम १६ को यात्रा तय गरेको छ । स्पेनले स्लोभाकियालाई ५-० ले पराजित गरेको हो । यस समूहमा स्लोभाकिया ३ खेलमा ३ अंक जोड्दै तेस्रो स्थानमा छ । पोल्यान्ड भने १ अंकसहित पुछारमा रहेर प्रतियोगिताबाट बाहिरियो ।

खेलको दोस्रो मिनेटमा नै एमिल फोर्सबर्गले गोल गर्दै स्वीडेनलाई अग्रता दिलाए । एलेक्जेन्डर इसाकलाई पेनाल्टी क्षेत्रबाहिर रोक्ने प्रयासमा डिफेन्डर असफल भएपछि फुत्किएको बलमा फोर्सबर्गले गोल गरेका थिए ।

१७ औं मिनेटमा कप्तान रोबर्ट लेवान्डोस्कीले केहि सेकेन्डको अन्तरमा नै लगातार पोस्टमा प्रहार गर्दा पोल्यान्ड खेल बराबर गर्नबाट चुक्यो । पिटर जिलेन्सकीको क्रसमा लेवान्डोस्कीको पहिलो हेडर क्रसबारमा लागेर फर्किएको थियो । उनले तुरुन्त उक्त बललाई दोस्रो प्रहार गर्दा पनि बार नै बाधक बन्दा पोल्यान्ड खेलमा फर्कन सकेन ।

दोस्रो हाफको ५९ औं मिनेटमा फोर्सबर्गले व्यक्तिगत दोस्रो गर्दै २-० को अग्रता दिलाए । वैकल्पिक खेलाडी डेजान कुलुसेभ्सकीले अघि बढाएको आक्रमणलाई फोर्सबर्गले गोलमा परिणत गरेका थिए । कुलुसेभ्सकीले मैदानको बीच भागबाट अघि बढाएको बल पेनाल्टी क्षेत्रभित्र फोर्सबर्गलाई उपलब्ध गराएपछि लाइप्जिगका मिडफिल्डरले सटिक फिनिस गरेका थिए ।

लेवान्डोस्कीले त्यसको २ मिनेटपछि नै दर्शनीय गोल गर्दै पोल्यान्डलाई खेलमा फर्काए । पेनाल्टी क्षेत्रको बायाँ भागबाट उनले सुन्दर प्रहार गर्दै गोलरक्षक रोबिन ओल्सनलाई कुनै अवसर नै दिएनन् । ८४ औं मिनेटमा लेवान्डोस्कीले नै पोल्यान्डलाई बराबरीमा ल्याए । फ्रान्कोसकीको क्रसमा दुवै डिफेन्डर झुक्किन पुग्दा ६ यार्ड बक्स क्षेत्रभित्र एक्लै रहेका लेवान्डोस्कीले सहज फिनिस गरेका थिए ।

इन्ज्युरी समयको चौथो मिनेटमा क्लेसनले गोल गर्दै स्वीडेनको जित पक्का गरे । युभेन्ट्सका फरवार्ड कुलुसेभ्सकीले पोल्यान्डको डिफेन्सलाई पुन: समस्यामा पार्दै दिएको पासमा क्लेसनले गोल गर्दै स्वीडेनलाई समूह विजेता बनाए ।

यो पनि : सानदार जितसँगै स्पेन अन्तिम १६ मा