एजेन्सी – युरोपेली च्याम्पियनसिप २०२० अन्तर्गत ग्रुप अफ डेथ मानिएको समूह एफ को अन्तिम चरणको खेल चलिरहेको छ । पहिलो हाफमा पोर्चुगल र फ्रान्स बराबरीमा रहँदा हंगेरीले भने आफ्नो कप्तानको गोलको मदतले जर्मनीविरुद्ध अग्रता लिएको छ ।

पोर्चुगलले फ्रान्सविरुद्ध कप्तान क्रिस्टियानो रोनाल्डोको पेनाल्टी गोलमा अग्रता लिएको हो । फ्रान्सका कप्तान एवं गोलरक्षक ह्युगो लोरिसले फ्रिकिकमा आएको बललाई पन्च गर्ने क्रममा ड्यानिलो परेराको टाउकोमा लागेपछि रेफ्रीले पेनाल्टी दिएका थिए । रोनाल्डोले उक्त पेनाल्टीमा गोल गर्दै पोर्चुगललाई १-० ले अघि बढाए ।

त्यसअघि १६ औं मिनेटमा फ्रान्सले अग्रता लिने प्रयास गर्दा गोलरक्षक रुइ प्याट्रीसिओ बाधक बनेका थिए । पल पोग्बाको सानदार पासमा किलीयन एमबाप्पेको प्रहारलाई प्याट्रीसिओले विफल पारेका थिए । २० औं मिनेटमा रोनाल्डोको प्रहार पनि पोस्टभन्दा बाहिर गएको थियो ।

इन्ज्युरी समयमा रेफ्रीले फ्रान्सलाई पेनाल्टी प्रदान गरेका थिए । पोर्चुगलका डिफेन्डर नेल्सन समेडोले किलीयन एमबाप्पेलाई पेनाल्टी क्षेत्रभित्र लडाएपछि रेफ्रीले पेनाल्टी दिएका थिए । उक्त पेनाल्टीमा करीम बेन्जेमाले सहजै गोल गर्दै खेल १-१ को बराबरीमा ल्याए ।

अर्को खेलमा जर्मनी घरेलु मैदानमा हंगेरीसँग १-० ले पछि परेको छ । खेलको ११ औं मिनेटमा कप्तान एडम स्जालाईले गोल गर्दै हंगेरीलाई अग्रता दिलाए । उनले रोनाल्ड सल्लाईको क्रसमा डाइभिङ हेडरमार्फत गोल गरेका थिए । त्यसअघि एन्टोनियो रुडीगरको हेडर पोस्टभन्दा बाहिर जाँदा जर्मनीले अग्रता लिनबाट चुकेको थियो ।

खेलको २१ औं मिनेटमा जर्मनीका डिफेन्डर म्याट्स हमल्सको प्रहार पोस्टमा लाग्दा जर्मनी खेलमा फर्कन सकेन । जोशुवा किम्मिखको कर्नरमा हमल्सको हेडरले गोलरक्षकलाई बिट गरेपनि पोस्ट बाधक बनेको थियो । ३९ औं मिनेटमा सल्लाईको प्रहारलाई कप्तान म्यानुएल नोएरले बचाउँदै अग्रता दोब्बर पार्न दिएनन् ।

यस समूहमा फ्रान्स अन्तिम १६ मा पुगिसकेको अवस्थामा बाँकी तीन टोलीकै अघि बढ्ने सम्भावना छ । अहिलेको नतिजा अनुसार फ्रान्स शीर्षस्थानमा रहँदा पोर्चुगल दोस्रो र हंगेरी तेस्रो स्थानमा छन् । जर्मनीले गोल फर्काउन नसकेको अवस्थामा बाहिरिने सम्भावना रहेको छ । पोर्चुगलले भने कम्तिमा बराबरी गरे अर्को चरणमा जानेछ ।

यो पनि : ब्राजिल र कोलोम्बिया भिड्दै