एजेन्सी – युरोपेली च्याम्पियनसिप २०२० अन्तर्गत साविक विजेता पोर्चुगलले समूह एफ को अन्तिम खेलमा फ्रान्सलाई बराबरीमा रोकेको छ । कप्तान क्रिस्टियानो रोनाल्डोले पेनाल्टीमा दुई गोल गरेपछि पोर्चुगल २-२ को बराबरीमा रोक्न सफल भयो ।

यस बराबरीसँगै फ्रान्स समूह विजेताको रुपमा अन्तिम १६ मा प्रवेश गरेको छ । अपराजित फ्रान्सले ३ खेलमा ५ अंक जोड्यो । पोर्चुगल भने ३ खेलमा ४ अंकसाथ तेस्रो स्थानमा रहयो । जर्मनीले आफ्नो खेलमा हंगेरीसँग २-२ को बराबरी खेलेपछि ४ अंक जोड्दै दोस्रो भयो । समान अंक भएपनि हेड टु हेडमा पोर्चुगल तेस्रो भएको हो । पोर्चुगल पनि उत्कृष्ट ४ तेस्रो स्थाको टोलीमा पर्दै अघि बढेको छ । ३ खेलमा २ अंक जोडेको हंगेरी भने समूह चरणबाट नै बाहिरियो ।

पोर्चुगलले फ्रान्सविरुद्ध कप्तान क्रिस्टियानो रोनाल्डोको पेनाल्टी गोलमा अग्रता लिएको थियो । फ्रान्सका कप्तान एवं गोलरक्षक ह्युगो लोरिसले फ्रिकिकमा आएको बललाई पन्च गर्ने क्रममा ड्यानिलो परेराको टाउकोमा लागेपछि रेफ्रीले पेनाल्टी दिएका थिए । रोनाल्डोले उक्त पेनाल्टीमा गोल गर्दै पोर्चुगललाई १-० ले अघि बढाए ।

त्यसअघि १६ औं मिनेटमा फ्रान्सले अग्रता लिने प्रयास गर्दा गोलरक्षक रुइ प्याट्रीसिओ बाधक बनेका थिए । पल पोग्बाको सानदार पासमा किलीयन एमबाप्पेको प्रहारलाई प्याट्रीसिओले विफल पारेका थिए । २० औं मिनेटमा रोनाल्डोको प्रहार पनि पोस्टभन्दा बाहिर गएको थियो ।

इन्ज्युरी समयमा रेफ्रीले फ्रान्सलाई पेनाल्टी प्रदान गरेका थिए । पोर्चुगलका डिफेन्डर नेल्सन समेडोले किलीयन एमबाप्पेलाई पेनाल्टी क्षेत्रभित्र लडाएपछि रेफ्रीले पेनाल्टी दिएका थिए । उक्त पेनाल्टीमा करीम बेन्जेमाले सहजै गोल गर्दै खेल १-१ को बराबरीमा ल्याए ।

दोस्रो हाफको सुरुवातमै बेन्जेमाले व्यक्तिगत दोस्रो गोल गर्दै फ्रान्सलाई अग्रता दिलाए । पल पोग्बाको थ्रु पासमा बेन्जेमाले अफसाइड ट्रयाप बिट गर्दै पेनाल्टी क्षेत्र भित्र पुगेर सुन्दर फिनिस गरेका थिए । असिस्टेन्ट रेफ्रीले सुरुमा अफसाइडको संकेत दिएपनि भीएआरले गोललाई मान्यता दिएको थियो ।

५८ औं मिनेटमा पोर्चुगलले खेल बराबरी गर्ने सुवर्ण अवसर पायो । पेनाल्टी क्षेत्रभित्र डिफेन्डर जुल्स कुन्डेले ह्यान्ड गरेपछि प्राप्त पेनाल्टीमा रोनाल्डोले कुनै गल्ति गरेनन् । रोनाल्डोले गोलरक्षक लोरिसलाई विपरित दिशामा पठाउँदै खेल २-२ को बराबरीमा ल्याए । यस गोलसँगै रोनाल्डोले अन्तर्राष्ट्रिय फुटबलमा इरानका अलि दाइले राखेको १ सय ९ गोलको कीर्तिमान समेत बराबरी गरे ।

६८ औं मिनेटमा फ्रान्स पुन: अग्रता लिनबाट थोरैले चुक्यो । पोग्बाले पेनाल्टी क्षेत्र बाहिरबाट गरेको प्रहार पोर्चुगलका गोलरक्षक रुई प्याट्रीसिओले बचाएपछि क्रसबारमा लागेर फर्किएको थियो । फ्रान्सले खेलको अन्त्यतिर बल पोसेसनमा ध्यान दिँदै आक्रमण बुनेपनि पोर्चुगल रक्षात्मक रुपमा बलियो प्रदर्शन गर्दै अंक जोड्न सफल रहयो ।

यो पनि : हंगेरीसँग रोकिएपनि जर्मनी अन्तिम १६ मा

युरो कप : अन्तिम १६ मा को-को भिड्दै? (नेपाली समयअनुसार)