एजेन्सी – युरोपेली च्याम्पियनसिप २०२० अन्तर्गत राउन्ड अफ १६ को खेलमा स्पेनविरुद्ध सामना गर्नुअघि क्रोएसियालाई ठूलो झट्का लागेको छ । टोलीका मुख्य फरवार्ड इभान पेरिसिच कोरोना भाइरस संक्रमणका कारण आइसोलेसनमा बस्नुपर्ने भएको छ ।

सोमबार हुने खेलको लागि तयारीका क्रममा रहेको टोलीमा गरिएको परिक्षणबाट पेरिसिचलाई कोरोना संक्रमण देखिएको हो । उनले अब १० दिन सेल्फ आइसोलेसनमा बस्नेछन् । उनको प्रतियोगितामा सहभागिता अब क्रोएसियाको नतिजामा भर पर्नेछ । इन्टर मिलानका फरवार्ड पेरिसिचले क्रोएसियाका लागि उच्च प्रदर्शन गर्दै आएका थिए ।

३२ वर्षीय इन्टरका फरवार्डले राष्ट्रिय टोलीका लागि १ सय बढी खेल खेलिसकेका छन् । उनले सन् २०१८ मा विश्वकपमा उपविजेता बन्दा यादगार प्रदर्शन गरेका थिए । उनी सेमिफाइनलमा इंग्ल्यान्डलाई पराजित गर्दा खेलको म्यान अफ द म्याच घोषित भएका थिए । उनले फाइनलमा पनि फ्रान्सविरुद्ध हारमा गोल गरेका थिए ।

पेरिसिचले युरो २०२० मा सबै तीन खेलमा सुरुवात गरेका थिए । उनले चेक रिपब्लिकविरुद्ध खेलमा बराबरी गोल गरेका थिए । स्कटल्यान्डविरुद्ध ३-१ को जितमा पनि उनको १ गोल र १ असिस्ट सामेल थियो ।

स्पेन र क्रोएसियाबीच खेल सोमबार हुनेछ । यस खेलको विजेताले फ्रान्स र स्विट्जरल्यान्डबीच खेलको विजेतासँग क्वाटरफाइनलमा खेल्नेछ । यसअघि स्कटल्यान्डका बिलि गिल्मरलाई पनि कोरोना संक्रमण देखिएको थियो । त्यस्तै स्पेनका कप्तान सर्जियो बुस्केट्सले प्रतियोगिता सुरु हुनु केहि दिन अघि कोरोना भएपछि ठिक हुँदै पुनरागमन गरिसकेका छन् ।

यो पनि : यस्तो छ पोर्चुगलविरुद्ध बेल्जियमको इतिहास