एजेन्सी – युरोपेली च्याम्पियनसिप अन्तर्गत नेदरल्यान्ड्स र चेक रिपब्लिकबीच जारी राउन्ड अफ १६ को तेस्रो खेलको पहिलो हाफमा गोलरहित बराबरीमा टुंगिएको छ । निकै प्रतिस्पर्धात्मक पहिलो हाफमा दुवै टोलीले गोल गर्ने अवसर पाएपनि सदुपयोग गर्न सकेनन् ।

आठौं मिनेटमा नेदरल्यान्ड्सले गोलको सुन्दर अवसर सिर्जना गरेको थियो । कर्नरमा म्यथिस डी लिग्टको हेडरले पोस्टको दिशा लिन नसकेपछि उक्त बलमा मेम्फिस डिपाएले गरेको प्रहार बाहिरियो । १६ औं मिनेटमा डोनी मालेनको प्रहारलाई गोलरक्षक टोमस भाच्लिकले बचाउँदै कर्नर दिएका थिए । जवाफी कर्नरमा पनि उनी नै बाधक बने ।

२२ औं मिनेटमा कप्तान टोमस सुचेकको हेडर थोरैले बाहिरिंदा चेकले अग्रता लिन सकेन । दायाँ विंगबाट सेभ्चिकले गरेको क्रसमा सुचेकको डाइभिङ हेडरमा गोलरक्षक बिट भएपनि पोस्टभन्दा थोरैले बाहिरिएको थियो । २८ औं मिनेटमा प्याट्रिक सिकको प्रहार डे रुनलाई लाग्दै गोलरक्षक मार्टेन स्टेकेलेनबर्गले सहजै बचाए ।

३८ औं मिनेटमा चेकले अघि बढ्ने सुवर्ण अवसर खेर फाल्यो । एन्टोनिन बाराकले पेनाल्टी क्षेत्र भित्रबाट पोस्टमा प्रहार डिफेन्डर डी लिग्टले छेक्दा खेल गोलरहित नै रहयो । काउन्टर अट्याकमा राम्रो मुभ बनाएको चेकका लागि मासोपुस्तको पासमा बाराक गोल गर्न चुकेका थिए । लगत्तै अर्कोतर्फ डम्फ्राइजको लो क्रसमा मालेन बलसम्म पुग्न सकेनन् ।

यस खेलको विजेताले क्वाटरफाइनलमा डेनमार्कको सामना गर्नेछ । डेनमार्कले शनिबार वेल्समाथि ४-० को जित दर्ता गर्दै क्वाटरफाइनलमा स्थान पक्का गरेको थियो ।

नेदरल्यान्ड्स सुरुवाती ११ : (३-५-२)

मार्टेन स्टेकेलेनबर्ग : स्टेफान डे भ्राए, म्याथिस डे लिग्ट, डेली ब्लीन्ड : डेन्जेल डम्फ्राइज, मार्टेन डे रुन, जिओर्जिनिओ वाइनाल्डम, फ्रेंकी डे जोङ, प्याट्रिक भान आनहोल्ट : मेम्फिस डिपाए, डोनी मालेन

चेक सुरुवाती ११ : (४-२-३-१)

टोमस भाच्लिक : पाभेल कादेर्बेक, टोमस कालास, ओन्द्रेज सेलुत्स्का, भ्लादिमिर सौफाल : टोमस होलेस, टोमस सुचेक : लुकास मासोपुस्त, एन्टोनिन बाराक, पिटर सेभ्चिक : प्याट्रिक सिक

यो पनि : ‘रोनाल्डोका लागि विशेष योजना छैन’ – बेल्जियमका प्रशिक्षक मार्टिनेज