स्वीडेनको नजर क्वाटरफाइनलमा

एजेन्सी – युरो २०२० अन्तर्गत राउन्ड अफ १६ को खेलमा मंगलबार युक्रेन र स्वीडेन खेल्दैछन् । स्कटल्यान्डको ह्याम्पडेन पार्कमा हुने खेल नेपाली समयअनुसार मध्यरात १२:४५ बजे सुरु हुनेछ ।

स्वीडेनले समूह चरणमा प्रभावशाली प्रदर्शन गर्दै अन्तिम १६ मा स्थान बनाएको थियो । टोलीका मुख्य खेलाडी एमिल फोर्सबर्गले शनिबार प्रशिक्षण नगरेपनि आफू खेलका लागि फिट रहेको बताएका छन् । युक्रेनका डेनिस पोपोभ र एलेक्जेन्डर जुब्कोभ भने चोटका कारण नखेल्ने सम्भावना छ । भिक्टर सिग्नाकोभ प्रतियोगितामा पहिलो सुरुवात गर्न तत्पर छन् ।

स्वीडेन युरोमा तेस्रो पटक अन्तिम १६ मा प्रवेश गर्न सफल रहेको हो । सन् २०२१ मा अपराजित रहेको स्वीडेनले पछिल्लो ८ मध्य ७ खेलमा जित हासिल गरेको छ । स्वीडेनले समूह चरणमा सबैभन्दा कम पास खेल्दै कुल ५ सय ९१ पास खेलेको छ । पोल्यान्डविरुद्ध १ मिनेट २२ सेकेन्डमा अग्रता लिएको स्वीडेन सोहि सुरुवातको अपेक्षामा हुनेछ ।

युक्रेन इतिहासमा पहिलो पटक समूह चरण पार गरेपछि सुखद नतिजाको आशामा हुनेछ । युरोको पछिल्लो ८ मध्य ७ खेलमा पराजित युक्रेनले स्वीडेनलाई स्तब्ध पार्न निकै मिहिनेत गर्नुपर्छ । हालसम्म युक्रेनले यस प्रतियोगितामा क्लिन सिट राख्न सकेको छैन ।

यो पनि : जर्मनी र इंग्ल्यान्डको महाभिडन्त