एजेन्सी – अतिरिक्त समयको दोस्रो हाफको इन्ज्युरी समयमा वैकल्पिक फरवार्ड आर्टेम दोभ्बिकले गोल गरेपछि युक्रेनले स्वीडेनलाई २-१ ले पराजित गर्दै युरोपेली च्याम्पियनसिपको क्वाटरफाइनलमा स्थान पक्का गरेको छ ।

स्वीडेनले खेलको सुरुवाती मिनेटदेखि नै आक्रमण बुन्दै दबाब कायम गरेपनि सुरुवाती अग्रता लिन भने चुकेको थियो । एकपछि अर्को आक्रमणमा युक्रेनका डिफेन्स र गोलरक्षकले संयमित प्रदर्शन गरेपछि खेल बराबरीमा नै रहेको थियो । तर कप्तान यार्मालेन्कोको चलाखीपूर्ण मुभ युक्रेनले खेलको विपरित मोडमा अग्रता लियो । त्यसपछि पनि लगातार आक्रमण बुनेको स्वीडेनले पहिलो हाफको अन्त्यतिर फोर्सबर्गको गोलमा बराबरी गरेको थियो ।

दोस्रो हाफमा दुवै टोलीले गोल गर्न नसक्दा खेल अतिरिक्त समयमा लम्बिएको थियो । अतिरिक्त समयको पहिलो हाफमा स्वीडेन १० खेलाडीमा समेटिएपछि युक्रेनले खेलमा दबाब राख्ने अवसर पाएको थियो । दोस्रो हाफको इन्ज्युरी समयमा दोभ्बिकले गोल गर्दै युक्रेनलाई जित दिलाएका थिए । उनले जिन्चेन्कोको क्रसमा गोल गर्दै युक्रेनलाई पहिलो पटक क्वाटरफाइनलमा पुर्याएका थिए । अब युक्रेनले क्वाटरफाइनलमा इंग्ल्यान्डको सामना गर्नेछ ।

१८ औं मिनेटमा डेजान कुलुसेभ्सकीको क्रसमा अनमार्क रहेका एमिल फोर्सबर्गले राम्रोसँग हेडर प्रहार गर्न नसक्दा युक्रेनको खतरा टरेको थियो । लगत्तै एलेक्जेन्डर इसाकले पेनाल्टी क्षेत्र भित्रबाट गरेको प्रहार गोलरक्षक बिट भएको अवस्थामा पोस्टभन्दा थोरैले बाहिरियो ।

खेलको २७ औं मिनेटमा युक्रेनले ओलेक्जान्दर जिन्चेन्कोको गोलमा अग्रता लियो । पेनाल्टी क्षेत्रको दायाँ भागबाट कप्तान आन्द्रे यार्मालेन्कोले आउटसाइड फुटबाट दिएको क्रसलाई बायाँ विंगबाट जिन्चेन्कोले गोल गरेका थिए । उनले पहिलो टचमा नै गरेको शक्तिशाली प्रहार गोलरक्षक रोबिन ओल्सनको हातमा लाग्दै गोल भएको थियो ।

२९ औं मिनेटमा स्वीडेनका कप्तान सबास्टियन लार्सनले चलाखीपूर्ण फ्रिकिक लिँदै सिधै गोलमा गरेको प्रहारलाई गोलरक्षक बुस्कानले मुस्किलले बचाए । ४२ औं मिनेटमा फोर्सबर्गले गोल गर्दै स्वीडेनलाई खेलमा फर्काए । उनले पेनाल्टी क्षेत्र बाहिरबाट गरेको प्रहार डिफेन्डरलाई डिफ्लेक्ट हुँदै गोलमा परिणत भएको थियो ।

६६ औं मिनेटमा गोलरक्षक बुस्कानले उत्कृष्ट बचाउ गर्दै खेल बराबरीमा कायम राखे । कुलुसेभ्सकीले पेनाल्टी क्षेत्रको दायाँ भागबाट गरेको प्रहारलाई उनले डाइभ दिँदै बाहिर पठाएका थिए । जवाफी कर्नरमा युक्रेनले काउन्टर अट्याक गर्दै राम्रो आक्रमण बुनेपनि कप्तान यार्मालेन्कोको अन्तिम प्रहार गोलरक्षक ओल्सनको हातमा टुंगियो ।

६९ औं मिनेटमा फोर्सबर्गको प्रहारमा क्रसबार लाग्दा स्वीडेन अघि बढ्न सकेन । उच्च लयमा रहेका फोर्सबर्गले तीन डिफेन्डरलाई छक्याउँदै पेनाल्टी क्षेत्रको ठिक भित्रबाट गरेको प्रहारमा गोलरक्षक बुस्कान बिट भएपनि क्रसबार बाधक बनेको थियो । त्यसपछि दुवै टोलीबाट गोल हुन नसक्दा खेल अतिरिक्त समयमा लम्बिएको थियो ।

अतिरिक्त समयको ९९ औं मिनेटमा स्वीडेन १० खेलाडीमा समेटियो । युक्रेनका आर्टेम बेसेदीनलाई ट्याकल गरेपछि मार्कस ड्यानीएल्सनले रातो कार्ड पाएका थिए । उनले ट्याकल गर्ने क्रममा बल भेटेपनि सिधै बेसेदीनको घुँडामा लाग्दा रेफ्रीले भीएआरको सहायता लिँदै मैदानबाहिर पठाएका थिए ।

यो पनि : युरोको क्वाटरफाइनल समीकरण पूरा

त्यसअघि घरेलु मैदान वेम्बलीमा जर्मनीलाई पराजित गर्दै इंग्ल्यान्डले युरोपेली च्याम्पियनसिप २०२० को क्वाटरफाइनलमा स्थान पक्का गरेको थियो । दोस्रो हाफमा रहिम स्टर्लिङ र ह्यारी केनले गोल गरेपछि इंग्ल्यान्ड २-० को जितसँगै राउन्ड अफ १६ चरण पार गर्न सफल रहयो ।

पहिलो हाफमा दुवै टोलीले आफूले पाएको अवसर सदुपयोग गर्न नसक्दा खेल गोलरहित रहेको थियो । दोस्रो हाफको सुरुवातमा जर्मनीले केहि दबाब राखेपनि खेल अघि बढ्दै जाँदा इंग्ल्यान्ड खेलमा फर्किएको थियो । त्यसपछि इंग्ल्यान्डले ९ मिनेटको अन्तरमा दुई गोल गर्दै खेल आफ्नो पकडमा ल्यायो । त्यसबीचमा जर्मनीका थोमस मुलरले बराबरी गर्ने सुवर्ण अवसर खेर फाल्दा इंग्ल्यान्ड अघि बढेको हो । इंग्ल्यान्डले अब सेमिफाइनल प्रवेश गर्न युक्रेन र स्वीडेनको विजेतासँग खेल्नेछ ।

१६ औं मिनेटमा कप्तान म्यानुएल नोएरले सुन्दर बचाउ गर्दै खेल गोलरहित नै राखे । रहिम स्टर्लिङले पेनाल्टी क्षेत्र बाहिरबाट गरेको प्रहारलाई नोएरले आफ्नो बायाँतर्फ डाइभ दिँदै विफल पारेका थिए । २७ औं मिनेटमा ह्यारी मगाएरको हेडरले पोस्टको दिशा लिन नसक्दा इंग्ल्यान्ड अग्रता लिनबाट चुक्यो । ट्रीपिएरको क्रसमा मगाएरले फितलो हेडर गरेपछि जर्मनी खेल बराबरी राख्न सफल भएको थियो ।

त्यसअघि १७ औं मिनेटमा पनि उनको हेडर सिधै गोलरक्षक नोएरको हातमा पुगेको थियो । खेलको ३२ औं मिनेटमा गोलरक्षक जोर्डन पिकफर्डले उत्कृष्ट बचाउ गर्दै खेल बराबरीमा राखे । काइ हाभर्ट्जको पासमा टिमो वेर्नरले वन भर्सेस वनको स्थितिमा पेनाल्टी क्षेत्र भित्रबाट गरेको प्रहारलाई पिकफर्डले विफल पारेका थिए ।

इन्ज्युरी समयमा इंग्ल्यान्डका कप्तान ह्यारी केनले अग्रता लिने अवसर सदुपयोग गर्न सकेनन् । स्टर्लिङले अघि बढाएको आक्रमणमा डिफेन्डरको ट्याकल पेनाल्टी क्षेत्रभित्र अनमार्क रहेका केनकै पथमा आएपनि उनले पहिलो टच नै खराब गरेपछि जर्मन डिफेन्सले बल क्लियर गर्ने अवसर पाएको थियो ।

४८ औं मिनेटमा उत्कृष्ट बचाउ गर्दै जर्मनीलाई अघि बढ्न दिएनन् । हाभर्ट्जले पेनाल्टी क्षेत्र भित्रबाट प्रहार गरेको शक्तिशाली हाफ भलीलाई पिकफर्डले डाइभ दिँदै पोस्टमाथि पन्च गरिदिएका थिए ।

७५ औं मिनेटमा इंग्ल्यान्डले स्टर्लिङको गोलमा अग्रता लियो । स्टर्लिङ आफैंले सुरु गरेको आक्रमणमा केन र ग्रिलिस हुँदै लुक शाको अन्तिम क्रसलाई उनले गोलमा परिणत गरेका थिए । शाले बायाँ विंगबाट गरेको लो क्रसमा दुई डिफेन्डरसँगै गोलरक्षक नोएर बिट भएपछि स्टर्लिङले सहजै गोल गरेका थिए ।

८१ औं मिनेटमा थोमस मुलरले गोल गर्ने सुवर्ण अवसर चुकाउँदा जर्मनीले खेल बराबर गर्न सकेन । स्टर्लिङले दिएको निकै खराब ब्याक पासलाई हाभर्ट्जले नियन्त्रणमा लिँदै मध्यभागबाट मुलरलाई खेलाएका थिए । अफसाइड ट्रयाप गरेको उत्कृष्ट पासलाई मुलरले एक्लै अघि बढाउँदै वन भर्सेस वनको स्थितिमा गरेको अन्तिम प्रहार पोस्टभन्दा बाहिर जाँदा जर्मनी बराबरी गर्नबाट चुकेको थियो ।

८६ औं मिनेटमा कप्तान केनले गोल गर्दै इंग्ल्यान्डको अग्रता दोब्बर पारे । शाले मिडफिल्डआ गनाब्रीबाट बल खोस्दै ग्रिलिसलाई दिएको पासपछि वैकल्पिक विंगरले नै क्रसमा केनको डाइभिङ हेडर गोलमा परिणत भएको थियो । यससँगै केनले जारी युरोमा पहिलो गोल पनि गरे ।