एजेन्सी – युरोपेली च्याम्पियनसिप २०२० अन्तर्गत बेल्जियमले इटालीविरुद्ध हुने क्वाटरफाइनल खेलमा आफ्ना दुई मुख्य खेलाडी इडेन हाजार्ड र केभिन डे ब्रुएनको साथ नपाउने सम्भावना बढेको छ ।

आइतबारको खेलमा बेल्जियमले साविक विजेता पोर्चुगललाई पराजित गर्दै क्वाटरफाइनलमा स्थान बनाउँदा कप्तान इडेन हाजार्ड र मिडफिल्डर केभिन डे ब्रुएनले चोटका कारण मैदान छाड्नुपरेको थियो । दुवै खेलाडी पोर्चुगलका खेलाडीबाट ट्याकल लाग्दा घाइते हुन पुगेका थिए । पहिलो हाफको अन्त्यतिर मिडफिल्डर जोआओ पाल्हिन्हाले गरेको ट्याकलमा डे ब्रुएन घाइते भएका थिए ।

हाफटाइममा विश्राम लिएर दोस्रो हाफमा मैदान उत्रेका उनले खेल्न भने सकेनन् । ४८ औं मिनेटमा नै उनले बेन्चलाई आफू खेल्न नसक्ने बताएपछि ड्रिज मर्टेन्स उनको स्थानमा प्रवेश गरेका थिए । डे ब्रुएनको प्रस्थानपछि बेल्जियमको आक्रमणमा कमी पनि देखिएको थियो ।

त्यस्तै हाजार्डले पनि खेल अवधिभर निकै ट्याकलको सामना गरे । यसैपनि एन्कलको चोटबाट ग्रस्त हुँदै आएका उनले ८५ औं मिनेटमा मैदान छाडेका थिए । हाजार्ड आफैंले पनि खेल्न कठिन भएपछि नै मैदान छाडेको बताए । यसपटक भने उनको चोट ह्यामस्ट्रीङमा लागेको हो ।

‘म घाइते हुन पुगें र ह्यामस्ट्रीङमा निकै दुखाइ महसुस भयो । अब चोटको अवस्था कस्तो छ भोली यकिन थाहा होला,’ हाजार्डले खेलपछि भनेका थिए, ‘विस्तृत परिक्षणपछि मात्र के कति चोट छ भन्ने यकिन हुनेछ । म खेल्न नसक्ने भएपनि कप्तानको भूमिकामा टोलीसँग नै रहनेछु ।’

हाजार्ड र डे ब्रुएन दुवै बेल्जियमको टोलीमा महत्त्वपूर्ण नाम हुन् । प्रतियोगिताको सुरुवातमा यी दुई पूर्ण फिट नहुँदा पनि बेल्जियमले राम्रो सुरुवात गरेको थियो । अब यानिक करास्को र ड्रिज मर्टेन्सलाई विकल्पका रुपमा हेरिएको छ ।

प्रशिक्षक रोबर्टो मार्टिनेजले दुवै खेलाडीको चोट धेरै गम्भीर नरहेपनि इटालीविरुद्ध खेलमा खेल्न सक्नेमा शंका रहेको बताए । ‘दुवैको चोटबारे सकारात्मक खबर छ । गम्भीर चोट नरहेकाले दुवै जना टोलीसँग नै रहनेछन् । हामीसँग धेरै समय नरहेकाले अहिले केहि भन्न सक्ने अवस्था छैन । उनीहरु अब सकेसम्म चाँडो फिट हुने प्रयासमा रहनेछन्,’ प्रशिक्षक मार्टिनेजले भने ।

बेल्जियमले अब क्वाटरफाइनलमा इटालीको सामना गर्दैछ । इटालीले निकै प्रतिस्पर्धात्मक खेलमा शनिबार अष्ट्रियालाई २-१ ले पराजित गरेको थियो ।

यो पनि : युरोको क्वाटरफाइनल समीकरण पूरा