काठमाडौं (हाम्रो खेलकुद)– नेपालले शनिबार हुने खेल जितेमा पहिलो खेलबाट मलेसियाको कुचिङमा सुरु भएको एएफसी सोलिडारिटी कप फुटबल प्रतियोगिताको सेमिफाइनल पुग्नेछ । समूह ए को पहिलो खेलमा बुधबार बु्रनाईले टिमोर लिस्टलेलाई ४–० ले हराएको थियो ।

त्यो नतिजाका कारण नेपालले शनिबार हुने आफ्नो पहिलो खेलमा टिमोर लिस्टेलाई हराए अन्तिम खेल अघि नै अन्तिम चारमा पुग्नेछ । बराबरीमा रोकिएको खण्डमा भने ब्रुनाईसँग नोभेम्बर ८ मा हुने खेलको नतिजासम्म कुर्नुपर्ने हुन्छ । नेपालसँग शनिबार पराजित भएमा टिमोर लिस्टे प्रतियोगिताबाट बाहिरनेछ । समूह एमा तीन टोली मात्र छन् । राउन्ड रोविनपछि समूहका शीर्ष दुई टोली सेमिफाइनल पुग्नेछन् ।

बुधबार ब्रुनाईले अजवान अलिको दुई गोलको मद्दतमा टिमोर लिस्टले विरुद्ध फराकिलो जित निकालेको थियो । दोस्रो हाफको १७ मिनेटका बीचमा ब्रुनाईले ४ गोल गरेको थियो । अजवानले ६३ औं मिनेटमा पहिलो र ६९ औं मिनेटमा अर्को गोल गरेको थियो । मोहम्मद शाह राजेन विन सइहले ७१ औं र अडी विन साइले ८० औै मिनेटमा गोल गरेका थिए । ब्रुनाई र टिमोर लिस्टको खेल नेपाली टोलीले पनि हेरेको थियो । नेपाली टोली बुधबार अभ्यास गरेको थियो । अर्को समूहमा श्रीलंका, लावस, मकाउ र मंगोलिया छन् ।