एजेन्सी – युरोपको ११ शहरमा जारी १६औं संस्करणको युरोपेली च्याम्पियनसिपको फाइनल खेल नेदरल्यान्ड्सका रेफ्री बियोर्न कुइपर्सले खेलाउने भएका छन् ।

युरोपियन फुटबलको सर्वोच्च निकाय (युइएफए)ले फाइनलमा मुख्य रेफ्री कुइपर्स रहने जनाएको छ । युरोकपको फाइनलमा इंग्ल्यान्ड र इटाली भिड्नेछन् । आइतबार राति हुने फाइनल खेल वेम्बली स्टेडियममा हुनेछ । ४८ वर्षीय कुइपर्स युरोकपको फाइनल खेलाउने पहिलो डच रेफ्री हुनेछन् । कुइपर्सले सातौंपटक युरोपियन प्रतियोगिताको फाइनल खेल खेलाउन लागेका हुन् ।

यसअघि पनि उनले इंग्ल्यान्ड र इटालीबीचको खेल खेलाइसकेका छन् । सन् २०१४ को विश्वकपको समूह चरणमा इंग्ल्यान्ड र इटाली भिड्दा कुइपर्स रेफ्री रहेका थिए । कुइपर्स सन् २००६ देखि फिफा रेफ्री रहँदै आएका छन् । उनले जारी युरोमा समूह चरणमा स्पेन र स्लोभाकियाविरुद्धको खेल खेलाएका थिए ।

यस्तै डेनमार्क र बेल्जियम तथा चेक रिपब्लिक र डेनमार्कबीचको खेल खेलाएका थिए । उनको सहयाकमा डच सन्डेर भान रोइकेल र इर्विन जेइन्स्ट्र रहनेछन् । फोर्थ अफिसियलमा स्पेनका कार्लाेस डेल सेरो ग्रान्डी रहनेछन् । बास्टियन डान्कर्ट भिडियो असिस्टेन्ट रेफ्री रहनेछन् । उनलाई क्रिस्टियन जिटेलमान, मार्काे फ्रिट्ज र पोल भान बोइकेलले साथ दिनेछन् । भीएआर टोलीका दुई सदस्य सेमिफाइनलमा डेनमार्क र इंग्ल्यान्डको खेलमा पनि जिम्मेवारीमा रहेका थिए ।

कुइपर्सले सन् २०१८ मा मार्से र एट्लेटिको म्याड्रिडबीचको युरोपा लिगको फाइनल, २०१४ मा रियल म्याड्रिड र एट्लेटिको म्याड्रिडबीचको च्याम्पियन्स लिगको फाइनल, २०१३ मा बेन्फिका र चेल्सीबीचको युरोपाको फाइनल, २००९ मा जर्मनी र इंग्ल्यान्डबीचको युरोपियन यु–२१, २००६ मा चेक र रसियाबीचको युरोपियन यु–१७ को फाइनल र २०११ मा बार्सिलोना र पोर्टाेबीचको युरोपियन सुपर कपको फाइनल खेल खेलाएका छन् ।